काठमाडौं । नेपालमा दुई करोड ४७ लाख ३५ हजार जनसंख्याको पहुँचमा इन्टरनेट सेवा पुगेको छ ।
नेपाल दूरसञ्चार प्राधिकरणले हालै सार्वजनिक गरेको चालु आर्थिक वर्षको छ महिनाको तथ्यंकाअनुसार मंसिर मसान्तको तुलनामा पुस महिनामा तीन लाख ८८ हजार बढी प्रयोगकर्ता थपिएका छन् । मंसिरमा कुल दुई करोड ४३ लाख ४७ हजार १५७ जनाको पहुँचमा इन्टरनेट सेवा थियो ।
कुल जनसंख्यामध्ये ८२.७९ प्रतिशत नागरिकको पहुँचमा इन्टरनेट सेवा पुगेको तथ्यांकमा उल्लेख छ । प्राधिकरणले जनसंख्या प्रक्षेपण (२०११–२०३०) लाई आधार मानेर प्रतिवेदन तयार पारेको हो । प्रतिवेदनमा प्राधिकरणले नेपालको कुल जनसंख्या दुई करोड ९८ लाख ७६ हजार ५३१ लाई आधार बनाएको छ ।
प्राधिकरणको तथ्यांकानुसार सबैभन्दा धेरै योगदान मोबाइल इन्टरनेटको रहेको छ । गत पुससम्म मोबाइल इन्टरनेटको हिस्सा ६०.३४ प्रतिशत छ । एक करोड १२ लाख बढीको पहुँचमा थ्रीजी इन्टरनेट पुगेको र यसमा सबैभन्दा धेरै नेपाल टेलिकमको ८६ लाख ३४ हजार र एनसेलको २५ लाख ६६ हजार रहेको जनाइएको छ । त्यस्तै, फोरजी प्रयोगकर्ता ६६ लाख ८९ हजार १०३ र इभिडियो प्रयोगकर्ता एक लाख ३६ हजार ५७३ रहेका छन् ।
प्राधिकरणको तथ्यांकानुसार फोरजीको प्रयोगकर्तामध्ये सबैभन्दा धेरै एनसेलका रहेका छन् । गत पुस मसान्तसम्म एनसेलका फोरजी प्रयोगकर्ता ४० लाख ८६ हजार १३९ रहेका छन् । नेपाल टेलिकमका फोरजी प्रयोगकर्ता २३ लाख ८३ हजार २५६ र स्मार्ट टेलिकमका दुई लाख १९ हजार रहेका छन् ।
यस्तै, फिक्स ब्रोडब्यान्डको हिस्सा २१.६८ प्रतिशत छ । यसमा एडीएसएलका आठ लाख ६४ हजार र एफटीटीएच इन्टरनेटका ५६ लाख ११ हजार रहेका छन् । रासस
