काठमाडौं । काठमाडौं मेयर कप एकदिवसीय पुरुष क्रिकेट प्रतियोगितामा विभागीय टोली एपीएफ क्लबले लगातार दोस्रो जित निकालेको छ ।
आइतबार भएको खेलमा नेपाल पुलिस क्लबलाई १ विकेटले पराजित गर्दै एपीएफले लगातार दोस्रो जित निकालेको हो ।
क्रिकेट मैदानमा भएको खेलमा पुलिसले दिएको २५९ रनको लक्ष्य एपीएफले ४९ ओभर ५ बलमा ९ विकेट गुमाएर पूरा गर्यो ।
एपीएफको जितमा सन्दीप जोराले ६१ रनको अर्धशतकीय इनिङ्स खेले । यस्तै सुवास खकुरेलले पनि ५० रनको अर्धशतकीय इनिङ्स खेले । आसिफ सेखले ४२ रन जोड्दा कमल ऐरीले १४ रन बनाए । बलिङपुतर्फ पुलिसका लागि पवन सर्राफले ५ विकेट लिए । योगेन्द्रसिंह कार्कीले २ विकेट लिए ।
यसअघि टस जितेर पहिले ब्याटिङ गरेको पुलिसले निर्धारित ५० ओभरमा ७ विकेट गुमाउँदै २५८ रन बनाएको थियो । पुलिसका लागि दीपेन्द्रसिंह ऐरीले शतकीय पारी खेले ।
प्रतिस्पर्धात्मक क्रिकेट करियरमा पहिलो शतक प्रहार गरेका उनले उनले समग्रमा १३१ बल खेल्दै ११ चौका र ६ छक्काको सहयोगमा १४० रन बनाएका थिए ।
नेपाली राष्ट्रिय टोलीका उप-कप्तान समेत रहेका दीपेन्द्रले प्रतिस्पर्धात्मक क्रिकेट करियरमा पहिलो शतक प्रहार गरेका हुन् । पुलिसका लागि पवन सरार्फले ३५ रन बनाउँदा सुनील धमलाले ३३ रन बनाए ।
बलिङतर्फ एपीएफका लागि कप्तान शरद भेषावकरले सर्वाधिक तीन विकेट लिए । त्यस्तै अविनाश बोहोराले दुई विकेट लिँदा अमर राउटेलाले एक विकेट लिए ।