काठमाडौं । पाल्पाको तानसेन नगरपालिकामा अवस्थित रानीमहललाई ‘हेरिटेज होटल’ बनाउने प्रस्तावले तरंग सिर्जना गरेको छ ।
नेपाल पर्यटन बोर्डले तानसेन नगरपालिकासँगको सहकार्यमा रानीमहललाई ‘हेरिटेज होटल’ बनाउन प्रस्ताव गरेपछि यसको पक्ष र विपक्षमा बहस सुरू भएको छ ।
तानसेन नगरपालिकाले पनि यस विषयमा कुराकानी भएको पुष्टि गरेको छ ।
बोर्डले हालसम्म गरेको काम र आगामी योजनाबारे जानकारी दिन केही दिनअघि गरेको पत्रकार सम्मेलनमा बोर्डका प्रमुख कार्यकारी अधिकृत धनञ्जय रेग्मीले रानीमहलको संरक्षण गर्न र आकर्षक गन्तव्य स्थल बनाउन यस्तो प्रस्ताव गरिएको बताएका थिए ।
“रानीमहलको संरक्षण भएको छैन । संरक्षण गर्न पैसा चाहिन्छ । अहिलेको संरचनालाई नविगारी आकर्षक गन्तव्यस्थल बनाउन सकिन्छ,” उनले भने, “भारतीय पर्यटकलाई लक्षित गरी महङ्गोमा बिक्री गर्न सकिन्छ भने होटेल बनाउँदा के हुन्छ ?” उनले भने ।
तर कतिपय सम्पदाविद् र स्थानीयले भने रानीमहललाई होटल बनाउन दिन नहुने तर्क गर्दै आएका छन् ।
तर तानसेन नगरपालिकाले रानीमहल वरिपरी रहेको जग्गामा सोही शैलीमा संरचना बनाउन सकिने प्रस्ताव गरेको छ ।
दुईसय रोपनी वरिपरी रानीमहलकै शैलीमा संरचना बनाउन सकिने नगरपालिकाले जनाएको छ ।
रानी महललाई आकर्षक पर्यटन गन्तव्यको रुपमा विकास गर्न त्यस वरपर रानी महलकै आर्किटेक शैलीमा अन्य संरचना बनाउन सकिने गरी नगरपालिकाले ‘मास्टर प्लान’ नै तयार पारेको छ ।
नगरपालिकाका मेयर अशोक कुमार शाहीले रानीमहल वरिपरी दुईसय रोेपनी जग्गा अधिग्रहण गर्ने र रानी महलकै शैलीमा संरचना बनाउन सकिने गरी डीपीआर बनाइएको बताए ।
रानी महल वरिपरी पर्यटकीय गतिविधि गर्न सकिने गरी डीपीआर बनाइएको उनले बताए ।
“रानीमहल जे छ सोही स्वरुपमा राख्ने, आन्तरिक साजसज्जा पनि पुरानै स्वरुपमा लैजाने र दुईसय रोपनीभित्र कुनै संरचना बनाउँदा पनि रानी महलको आर्किटेकसँग मिल्ने आर्किटेकमा नयाँ संरचना बनाउन दिने प्रस्ताव गरेका छौँ,” उनले भने ।
रानी महलको शैली भन्दा फरक किसिमको शैलीमा संरचना बनाउन नपाइने गरी मास्टर प्लान बनेको उनले बताए ।
उनले नगरपालिकाको ‘मास्टर प्लान’ को आधारमा अगाडि बढ्न सार्वजनिक निजी साझेदारीका लागि आवेदन माग गरेको पनि बताए ।
“निजी क्षेत्रलाई हाम्रो योजनाअनुसार संरचना निर्माण गर्न सकिन्छ भनेका छौं, त्यसमा अहिलेसम्म आवदेन आएको छैन, आवेदन आइसकेपछि के गर्ने भन्ने निर्क्योल गर्न सकिन्छ,” उनले बाह्रखरीसँग भने ।
यता बोर्डले पनि रानीमहलको कुनै संरचना नबिगारी ‘हेरिटेज होटेल’ बनाउन सकिने बताएको छ ।
रानीमहलको संरक्षणकै लागि बोर्डले यस्तो प्रस्ताव गरेको बोर्डका सीईओ रेम्मीले बताए ।
“हामीले होटल नै बनाउनुपर्छ भनेका छैनौँ । त्यसलाई संग्रहालय पनि बनाउन सकिन्छ । तर, बनाउनुपर्यो । त्यसै छोड्नु भएन । त्यसको संरक्षण गर्नुपर्छ भन्ने हो,” उनले बाह्रखरीसँग भने ।
रानीमहल तानसेन नगरपालिकास्थित कालीगण्डकी किनारमा अवस्थित ऐतिहासिक दरबार हो । जनरल खड्ग शमशेरले आफ्नी रानी तेजकुमारीको सम्झनामा वि.सं १९५४ सालमा निर्माण गरेका थिए । रानीमहललाई प्रेमको प्रतीकका रुपमा मानिन्छ ।
लामो समयदेखि जिर्णअवस्थामा रहेको रानी महलको केही वर्षअघि स्थानीय युवाले संरक्षण गर्दै आएका थिए । स्याङ्जा र पाल्पाका युवाहरुको समूहले उक्त दरबार क्षेत्रको संरक्षण गर्नुपर्ने आवाज उठाएपछि पुनर्निर्माण थालिएको थियो ।
बोर्डले स्थानीय सरकारसँगको छलफलपछि नै यस्तो प्रस्ताव गरेको रेग्मीले बताए ।
तानसेन नगरपालिकाका मेयर शाहीले होटल बनाउने भन्ने प्रस्तावलाई गम्भिरतापूर्वक हेरिरहेको बताए । “हामीले होटेल बनाउने भन्ने प्रस्तावलाई गम्भिरतापूर्वक हेरिरहेका छौं । तर, रानीमहललाई ऐतिहासिक संरचनाकै रुपमा राख्नुपर्छ भन्ने मान्यता नगरपालिकाको छ,” उनले भने ।
यद्यपी उनले रानीमहललाई होटेल नै बनाउने भन्ने प्रस्ताव भने नगरेको बताए । “डीपीआरमा होटेल भनेर राखेका छैनौँ,” उनले भने, “रानीमहलकै जस्तो संरचना बनाउनुपर्छ, त्यो भन्दा फरक बनाउन पाइँदैन । हामीले गरेको प्रस्ताव यहि हो । केन्द्रबाट फरक प्रस्ताव आयो भने फरक हो, हाम्रो सोचाइ त्यही छ,” उनले भने ।
