काठमाडौं । संगीत तथा रोयल्टी संकलन समाज नेपालले तत्काल रोयल्टी वितरण नगर्ने भएको छ । यातायात तथा विभिन्न क्षेत्रबाट संकलित रकम तत्काल बाँड्ने योजना नरहेको संगीत तथा रोयल्टी संकलन समाज नेपालले जनाएको छ ।
पूर्वाधार विकासमा रोयल्टी खर्च गर्ने वर्तमान कार्यसमितिको योजना छ । “सुरुआती चरणमा छौं । हामीलाई सरकारले सहयोग गरेको छैन । वितरणका लागि वैज्ञानिक मापदण्ड पनि छैन,” संगीत तथा रोयल्टी संकलन समाज नेपालका अध्यक्ष महेश खड्का भन्छन्, “रोयल्टी उठ्नवित्तिकै बाँड्नुपर्छ भन्ने छैन । डाटा कलेक्सनका लागि सफ्टवेर बनाउन सरकारी तथा गैरसरकारी निकायबाट एकलाख रुपैयाँ पनि कसैले दिएको छैन । यस्तो अवस्थामा उठेको रकम तत्काल बाँडीहाल्नेभन्दा पनि पूर्वाधार निर्माणमा खर्च गर्नुपर्छ भन्नेमा मेरो जोड छ ।”
संकलित रकम तत्काल वितरण गर्नुपर्छ भन्ने दबाब दिनु भनेको सुरुआती चरणमा रहेको रोयल्टी संकलन समाजलाई समाप्त पार्ने खेल भएको अध्यक्ष खड्काको बुझाइ छ ।
समाज पहिला आफैंमा भौतिक पूर्वाधार सम्पन्न हुनुपर्नेमा उनको जोड छ । रोयल्टी संकलन समाजमा अहिले १ करोड २५ लाख रुपैयाँ संकलन भएर बसेको छ । संकलन भएको रोयल्टी के आधारमा कसलाई वितरण गर्ने भन्ने वैज्ञानिक मापदण्ड नभएकाले समाजले स्रस्टालाई वितरण गर्न सकेको छैन । यद्यपि कलेक्सन र वितरणको एउटा मापदण्ड भनेको बनिसकेको उनी बताउँछन् ।
“कोरोनाका कारण करिब नौ महिना रोयल्टी उठ्न सकेन । यो समयमा पनि हामीले कर्मचारीलाई तलब दिनुपर्यो । समाज बसेको घरको भाडा तिनुपर्यो,” अध्यक्ष खड्का भन्छन्, “यो स्वायत्त संस्था हो । संगीत तथा नाट्य प्रतिष्ठानलाई जस्तो सरकारले बजेट दिँदैन । त्यसैले यसलाई कसरी बलियो बनाउने हामी आफैंले सोच्नु पर्छ । भोलि डेरा भाडा तिर्नै सकिएन भने संस्था नै बन्द हुन्छ ।”
यद्यपि केही महिनाभित्र बस्ने साधारणसभाले यसबारे अन्तिम निर्णय गर्ने अध्यक्ष खड्का बताउँछन् । यदि साधारणसभाले पूर्वाधार निर्माणमा खर्च नगर्ने भन्दै वितरण गर्ने निर्णय गरे समाजले त्यसलाई स्वीकार गर्ने जानकारी दिए । माघ २६ गते वर्तमान कार्यसमितिको कार्यकाल सकिँदैछ । कार्यसमितिले कार्यकाल सकिएको बढीमा छ महिनासम्म साधारणसभा गरिसक्नुपर्छ ।
तस्बिर : महेश खड्काको फेसबुकबाट