काठमाडौं । प्रधानमन्त्री कप एकदिवसीय राष्ट्रिय क्रिकेट प्रतियोगिताअन्तर्गत प्रदेश १ ले जित निकालेको छ । शुक्रबार भएको खेलमा प्रदेश १ ले कर्णाली प्रदेशलाई ५९ रनले हराएको हो ।
र्कीतिपुरस्थित त्रिवि क्रिकेट मैदानमा प्रदेश १ ले कर्णाली प्रदेशलाई जितका लागि दिएको २१६ रनको लक्ष्य पाएको कर्णालीले जवाफी ब्याटिङमा ३५ ओभर खेल्दै सम्पूर्ण विकेट गुमाएर मात्र १५६ रन बनायो । कर्णालीका लागि विपिन रावलले सर्वाधिक ४७ रनको योगदान गरे । त्यस्ते निश्चल रावलले ३१ रन बनाउँदा कप्तान रवीन्द्रजंग शाहीले १८ रन बनाए ।
बलिङतर्फ प्रदेश १ का लागि मिनाश थापाले सर्वाधिक ५ विकेट लिए । १० ओभर बलिङ २ मेडन ओभर फालेर २६ रन खर्चे । प्रदेश १ का लागि दीपेश कँडेलले तीन विकेट लिँदा मनोज तामाङले दुई विकेट लिए ।
यसअघि टस जितेर पहिले ब्याटिङ गरेको प्रदेश १ ले निर्धारित ५० ओभरमा ९ विकेट गुमाउँदै २१५ रन बनाएको थियो ।
प्रदेश १ का लागि सिद्धान्त लोहनीले अर्धशतकीय पारी खेले । ९७ बल खेलेका उनले ९ चौकाको सहयोगमा ६६ रन बनाएका हुन् ।
त्यस्तै शुभाकर औरले ३६ रन बनाउँदा मनिस थापा २५ तथा श्रावण यादवले १७ रन बनाए । बलिङतर्फ कर्णालीका लागि रवीन्द्र शाहीले ३ विकेट लिए । त्यस्तै दिनेश अधिकारी र अनुज चुनराले समान २-२ विकेट लिँदा दिवान पुन र राज शाहले समान १-१ विकेट लिए ।
