काठमाडौं । प्रधानमन्त्री कप एकदिवसीय राष्ट्रिय क्रिकेटअन्तर्गत प्रदेश नम्बर–१ ले त्रिभुवन आर्मी क्लबलाई १३२ रनको लक्ष्य दिएको छ ।
बुधबार काठमाडौंको मूलपानी क्रिकेट मैदानमा टस जितेर पहिले ब्याटिङ रोजेको प्रदेश–१ ले ४० ओभर १ बलमा सम्पूर्ण विकेट गुमाउँदै १३१ रन बनाएको हो ।
प्रदेश–१ का लागि विवेक मेहेताले अर्धशतकीय पारी खेले । ८३ बल खेलेका उनले ७ चौका र १ छक्काको सहयोगमा ५० रन बनाए । त्यस्तै, फ्रिदोस अन्सारीले ९० बलमा १ चौका र १ छक्काको सहयोगमा ३२ रन बनाउँदा दीपक पासवानले १९ रनको योगदान गरे ।
बलिङतर्फ आर्मीका लागि शाहव आलमले सर्वाधिक ४ विकेट लिए । त्यस्तै आकाश चन्दले ३ विकेट लिए । सुशन भारी, भीम सार्की र राजेश पुलामीले समान एक/एक विकेट लिए ।
आजको खेलमा जित निकाल्दै आर्मी सेमिफाइनलमा प्रवेशका लागि आफूलाई बलियो बनाउने योजनामा छ । आर्मीले यसअघिको दुई खेलमा सहज जित निकालेको थियो । प्रदेश–१ भने पहिलो जितको खोजीमा हुनेछ ।