काठमाडौं । महिला लिगमा सहभागी टिमले चार विदेशी खेलाडी राख्न पाउने भएका छन् । आगामी माघ ७ बाट सुरु हुने प्रतियोगितामा अखिल नेपाल फुटबल संघ (एन्फा) ले लिगमा सहभागी हरेक टिमले चार विदेशी खेलाडी राख्न र खेलाउन पाउने व्यवस्था गरेको हो ।
माघको पहिलो साताबाट सुरु हुने महिला लिगमा तीन विभागीयसहित जिल्ला तथा नगरबाट छनोट भएका चार टिम गरी सात टिम खेलाउनेछ ।
एन्फाले पहिलोपटक महिला लिगमा समेत विदेशी खेलाडी राख्न पाउने व्यवस्था गरेको छ । एक महिना सञ्चालन हुने लिगका पहिलो र अन्तिम खेल दशरथ रंगशालामा हुनेछ । बाँकी सबै खेल ललितपुरको सातदोबाटोस्थित एन्फा कम्प्लेक्स हुने बताइएको छ ।
कोरोना भाइरसको महामारीलाई ध्यानमा राख्दै खेलाडीहरुको सुरक्षाको पनि एन्फाले राम्रो तयारी गरेको छ । प्रतियोगिताको विजेताले नगद १५ लाखसहित ट्रफी प्राप्त गर्नेछ । दोस्रोले ८, तेस्रोले ५, चौथोले ३ लाख रुपैयाँ प्राप्त गर्ने एन्फाले जनाएको छ ।
प्रतियोगिताको सर्वोकृष्ट खेलाडीले स्कुटर र हरेक विधाका खेलाडीले जनही ५० हजार रुपैयाँ प्राप्त गर्नेछन् ।
