काठमाडौं । प्रधानमन्त्री केपी शर्मा ओलीले निर्वाचन आयोगले नेकपाले लगेको निवेदन फिर्ता गरेको भनि गरेको जिकिर गलत सावित भएको छ । निर्वाचन आयोगले प्रचण्ड–नेपाल समूहले लगेको निवेदन फिर्ता गरेको प्रधानमन्त्री ओलीको जिकिर थियो ।
तर निर्वाचन आयोगले निवेदन फिर्ता नगरेको बताएको छ ।
प्रधानमन्त्री ओलीको जिकिर, प्रचण्ड-नेपाल समूहको निवेदन निर्वाचन आयोगले फिर्ता पठायो
उता नेकपाका स्थायी कमिटी सदस्य लिलामणि पोखरेलले निर्वाचन आयोगले निवेदन फिर्ता गरेको भन्ने प्रधानमन्त्री ओलीको जिकिर गलत भएको बताएका छन् ।
ओलीले शुक्रबार ३६ देशमा रहेका प्रवासी नेपाली समुदायका अगुवाहरूलाई भर्चुअल रुपमा सम्बोधन गर्दै आयोगले प्रचण्ड–नेपाल समूहले दिएको निवेदन फिर्ता गरेको जिकिर गरे ।
“उहाँहरुले निर्वाचन आयोगमा निवेदन दिनुभएको रहेछ । निर्वाचन आयोगले रित नपुगेको र अनुचित निवेदन भनेर रद्ध गरेर फिर्ता पठाइदियो । उहाँहरुको आधिकारिक पार्टी हामी हौं भन्ने दाबी थियो,” ओलीको भनाइ थियो ।
तर, बिहीबार निर्वाचन आयोग पुगेका पोखरेलले भने आफूहरुको निवेदन दर्ता भएको बताए ।
“अनुसूची १८ अनुसार हामीले पदाधिकारी फेरबदल भएको जानकारी गराएर आएका हौँ । पार्टी एकता गर्दा बखत दर्ता भएको ४४१ केन्द्रीय सदस्यमा भएको पदाधिकारी हेरफेरबारे जानकारी दियौँ । जसमध्ये तीनजनाको मृत्यु भएको छ, तीनजना राजदूत भएका छन् र पाँचजनाको संवैधानिक आयोगमा नियुक्ति भएको छ । त्यही कुरा जानकारी गराएका आएका हौँ,” उनले भने ।
उनले त्यसका लागि आफूसँगै राजेन्द्र पाण्डे, मुक्ति प्रधान, कृष्णभक्त पोखरेल रामनारायण बिडारी आयोगमा गएको जानकारी दिए ।
“आयोगले निर्णय गर्छ । हामीले निर्णय प्रवक्तामार्फत् जानकारी गराउछौँ । उहाँहरु आउनुभयो । हामीले सकेसम्म आजै निर्णय गरेर दुबै पक्षलाई पत्र पठाउछौँ” प्रमुख आयुक्त दिनेशकुमार थपलियाले भने ।
निर्वाचन आयोगका सहायक प्रवक्ता कोमलप्रसाद धमलाले पनि निवेदन फिर्ता नभएको बताए ।
“चिठी आएपछि दर्ता हुन्छ । प्रक्रियामा जान्छ । बाहिर फर्काइयो भन्ने कुरा कसरी आयो ? फिर्ता गरेको होइन,” धमलाले भने ।