काठमाडौं । कोभिड (कोरोना) का कारण रोकिएको खेलकुद गतिविधि छिटफुटबाहेक अझै चल्न सकेका छैनन् । खेलकुदको सर्वोच्च निकाय राष्ट्रिय खेलकुद परिषद्ले खेल फर्काउन औपचारिक रुपमा निवेदन नगरे पनि खेलकुद गतिविधि सञ्चालन भइरहेका छन् । खेलाडीदेखि खेलसँग आबद्ध पदाधिकारी निर्वाध रुपमा खेल फर्काउन आवाज उठाइरहेका छन् ।
छिटफुट रुपमा अहिले खेलकुद गतिविधि सञ्चालन हुन थालेका छन् । फुटबलदेखि क्रिकेटका खेलाडीले पुरानो लयमा फर्किन अभ्यास थाल्दा अन्य व्यक्तिगत विधाका खेलाडीले पनि जुरमुराइसकेका छन् ।
ब्याडमिन्टनका केही प्रतियोगिता सञ्चालन पनि भइसकेका छन् । भर्चुअल रुपमा केही प्रतियोगिता सुरु भए पनि कोभिडअघिको लय खेलकुदमा अझै देखिएको छैन । खेलकुद गतिविधिलाई निर्वाध सुरु गर्न राष्ट्रिय खेलकुद परिषद् तयार भएको उपाध्यक्ष शिव कोइरालाले बताए । फुटबल, क्रिकेटलगायत संघहरुलाई खेललाई नियमित बनाउन निर्देशन दिइसकेको पनि उपाध्यक्ष कोइरालाले बताए ।
खेलकुद गतिविधि कोरोना महामारीका कारण स्थगित गर्न नहुने भन्दै उनले खेलाडी पनि मानसिक रुपमा तयार हुन पर्ने बताए । खेल गतिविधि स्वास्थका हिसाब राम्रो भएको र कोरोना परास्त गर्ने अस्त्रका रुपमा सबैले प्रचार गर्नुपर्ने उनको तर्क छ ।
सामान्य तरिकाले खेलकुद सञ्चालनमा आए पनि सहज तरिकाले अगाडि बढ्न खेलाडीलाई अभ्यासको जरुरी हुन्छ । काठमाडौंमा भएको १३औं दक्षिण एसियाली खेलकुद (साग) मा दुई स्वर्ण पदक हात पारेका करातेका खेलाडी मन्डेकाजी श्रेष्ठले खेलाडीका लागि अभ्यास जरुरी हुने बताए ।
अन्तर्राष्ट्रियस्तरमा सहभागिता जनाउने खेलकुद गतिविधि प्रशिक्षण सुरु भइसकेका छन् । तर घरेलु प्रतियोगिता सुरु गर्नेमा भने अझै अन्योल देखिएको छ ।
-फाइल तस्बिर