लमही । प्रधानमन्त्री कप महिला राष्ट्रिय टि–ट्वान्टी क्रिकेट प्रतियोगितामा अहिले सुदूूरपश्चिम प्रदेशले प्रदेश १ लाई ५४ रनको सामान्य लक्ष्य प्रस्तुत गरको छ ।  दाङको लमही स्थित देउखुरी क्रिकेट मैदानमा टस जितेर पहिलो ब्याटिङ गरेको सुदूरपश्चिम प्रदेशले १६ ओभरमा ८ विकेट गुमाउँदै ५३ रन बनाएको हो । 

मौसमका कारण खेल केही समय ढिला सुरु भएको दुई टोलीबीचको खेल १६ ओेभरमा सारिएको थियो । सुदूरपश्चिमका लागि कविता जोसिले सर्वाधिक १४ रन बनाउन सफल भइन् । 

त्यस्तै रेवती धामीले ८ रन बनाउँदा डोली भट्टले ५ रन बनाउन सफल भइन् । बलिङतर्फ संगिता राईले सर्वाधिक तीन विकेट लिइन् । त्यस्तै सवनम राईले दुई विकेट लिँदा कप्तान रुविना क्षेत्री र निग्मा तामाङले समान एक–एक विकेट लिन सफल भइन् ।  आजको खेलमा जित निकाल्दै दुबै टोली सेमिफाइनल नजिक पुग्ने योजनामा रहेको छ । 

दुबै टोलीले पहिलो खेलमा सहज जित हात पारेका थिए । सुदूरपश्चिम प्रदेशले गण्डकी प्रदेशलाई हराएको थियो । त्यस्तै प्रदेश १ ले वागमती प्रदेशविरुद्ध सहज जित हात पारेको थियो ।