काठमाडौं । महिला प्रधानमन्त्री कप टि–ट्वान्टी क्रिकेटको पहिलो खेलमा साविक विजेता टोली एपीएफले सहज जित हात पारेको छ । शनिबार भएको खेलमा एपीएफले कर्णाली प्रदेशलाई २०४ रनको फराकिलो अन्तरले हराएको हो ।
देउखुरी अन्तराष्ट्रिय क्रिकेट मैदानमा एपीएफले दिएको २३६ रनको फराकिलो लक्ष्य पछ्याएको कर्णालीले १४ ओभर १ बलमा मात्र ३१ रन बनाउन सक्यो ।
कर्णालीका लागि कप्तान लक्ष्मि रावलले ६ रन बनाइन् । दीक्षा पुरीले ५ रन बनाउँदा तिर्शना विश्वकर्माले २ बनाइन् । एपीएफका लागि करुणा मण्डारीले सर्वाधिक ५ विकेट लिन सफल भइन् । राजमती ऐरीले दुई विकेट लिइन् ।
त्यस्तै सोनु खड्का र रेखा रावलले एक–एक विकेट लिन सफल भइन् । यसअघि टस जितेर पहिले ब्याटिङ गरेको एपीएफले निर्धातिर २० ओभरमा ४ विकेट गुमाउँदै २३५ रन बनाउन सफल भएको थियो ।
एपीएफका लागि कप्तान सीता राना मगरले अर्धशतकीय पारी खेलिन् । यो संस्करणको पहिलो अर्धशतक प्रहार गर्ने क्रममा उनले ५९ बलमा ८ चौका प्रहार गरेकी थिइन् ।
त्यस्तै एपीएफका लागि सीता मगरले ४४ रन बनाउँदा जोती पाण्डे ३२ तथा इन्दु ब्रमाले २२ रन को योगदान गरिन् । बलिङतर्फ कर्णालीका लागि दीक्षा पूरीले दुई विकेट लिँदा निशा प्राजुरी र अन्जु गुरुङले समान एक–एक विकेट लिन सफल भइन् ।
प्रतियोगिता अन्तर्गत आइतबार पहिलो खेलमा कर्णाली प्रदेशले बिहान ९ बजे लुम्बिनीसँग खेल्नेछ भने दोस्रो खेलमा एपीएफले प्रदेश २ को सामाना गर्नेछ ।