काठमाडौं । म्यानचेस्टर सिटी ईपीएल कप फुटबलको सेमिफाइनलमा प्रवेश गरेको छ । सिटी सहज जित निकाल्दै सेमिफाइनल स्थान बनाउन सफल भएको हो ।

मंगलबार राति भएको क्‍वाटर फाइनलमा सिटीले घरेलु टोली आर्सनललाई ४-१ गोल अन्तरले हराएको हो । खेलको तेस्रो मिनेटमा ग्राब्रियल जिससले गोल गर्दै सिटीलाई अग्रता दिलाए । लाकाजेट्टीले ३१औं मिनेटमा आर्सनलका लागि बराबरी गोल फर्काए ।

पहिलो हाफमा १-१ गोलको बराबरी खेलेको सिटीले दोस्रो हाफमा थप तीन गोल गर्न सफल भएको हो । ५४औं मिनेटमा रियाद महरेजले गोल गर्दै सिटीलाई २-१ अग्रता दिलाए ।

फिल फोडिनले ५९औं मिनेटमा सिटीका लागि तेस्रो गोल गरे । फोडिनकै क्रसमा लोपार्टीले ७३औं मिनेटमा हेडमार्फत गोल गर्दै सिटीको ४-१ को जित सुनिश्चित गरेका थिए ।