काठमाडौं । मण्डेकाजी श्रेष्ठ नेपाली खेलकुद क्षेत्रका लागि नौलो नाम होइन । विगत १५ वर्षदेखि उनी यस क्षेत्रमा सक्रिय छन् ।

करातेमा मण्डेले आफ्नो बेग्लै पहिचान बनाएका छन् । नेपाली खेलकुद पच्छ्याउनेले उनलाई ‘नेसन्स हिरो’का रुपमा चिन्दछन् । लामो समय खेलकुदमा लागेका मण्डेको चर्चा एक वर्षयता थप चुलिएको छ । उनले घरेलु भूमिमा सम्पन्‍न १३औं दक्षिण एसियाली खेलकुद (साग) मा दोहोरो स्वर्ण पदक जिते । नेपाली खेलकुद इतिहासमा करातेतर्फ एकै खेलाडीले दोहोरो स्वर्ण जितेको यो पहिलोपटक हो ।

“खेल करियरको अन्तिमसम्म देशका लागि ठूलो सफलता दिलाउने योजनामा थिएँ । खेल क्षेत्रमा पनि देशका लागि केही गर्ने योजनामा लागेँ । १५ वर्षसम्म सफलताको पछि भागेँ । आफ्नो मिहिनेतबाट कहिले टाढा भागिनँ । अन्तिममा घरेलु भूमिमा सफलता मिल्यो,’’ मण्डेले बाह्रखरीसँगको कुराकानीमा भने, ‘‘जीवनमा गरेको मिहिनेतको फल प्राप्त भएको अनुभव गरेँ । यो सफलताले दिलाएको खुसी त बेग्लै छ ।’’

मण्डे हाल नेपाल खेलकुद पत्रकार मञ्चले वार्षिक रुपमा आयोजना गर्ने पल्सर स्पोर्ट्स अवार्डअन्तर्गत ‘पिपल्स च्वाइस अवार्ड’को मनोनयनमा परेका छन् ।

नेपाली खेलकुद क्षेत्रकै ठूलो अवार्डको मनोनयनमा परेकोमा उनी दंग छन् । आफू मनोनयनमा पर्दा खेल जीवनमा अर्को ठूलो खुसी मिलेको उनले सुनाए ।

“लामो समय बिताएको खेलजीवन सफल भएको अनुभव भएको छ । १५ वर्षको खेल जीवनमा पहिलोपटक अवार्डका लागि मनोनयनमा पर्न सफल भएको छु । यसमा जित या हार के हुन्छ भन्ने विषय बेग्लै छ । तर, हजारौँ खेलाडीबाट मनोनयनमा पर्नु नै मेरो लागि सफलता हो । यो सफलताले मलाई धेरै खुसी दिलाएको छ । अवार्ड जसले जिते पनि हालका लागि हामी सबैजना विजेता हौं,” उनले भने ।

मण्डेले १३औं सागमा नेपालका लागि पुरुषतर्फ एकल काता र टिम कातामा गरी दुई स्वर्ण जितेका हुन् । १२औं सागमा खेलाडीसँग प्रशिक्षकको भूमिकामा गएका उनी घरेलु भूमिमा भएको सागलाई गुमाउन चाहन्थेनन् । राष्ट्रिय खेलकुदमा धेरैपटक च्याम्पियन बनेका उनी देशका लागि अन्तर्राष्ट्रिय खेलकुदमा सफल बन्न समय लाग्यो । तर, परिणाम राम्रो भयो ।

“नेपालका लागि सफल बन्ने चाहना अन्तिममा पूरा भयो । स्पोर्ट्स अवार्डका लागि पनि खेल करियरको अन्तिमतिर मनोनयनमा परेँ । जीवनमा खेल्दा जे-जति दुःख या पीडा भयो, त्यो सबै भुलेर अहिलेको खुसीलाई सम्हालेर बसिरहेको छु । यो सबै भइरहँदा जीवनमा मिहिनत गर्दा सफलता मिल्ने रहेछ भन्ने लागेको छ । यो सबै खुसीले म खेल जीवनको बाँकी अंश पनि खेलकुदमा नै लाग्नेछु,” उनले भने ।

मण्डे सक्रिय खेल करियरबाट सन्‍न्यास लिने योजनामा छन् । खेल जीवनबाट सन्‍न्यास लिए पनि उनी प्रशिक्षकको भूमिकामा आफूलाई सधैं बाँधी राख्‍ने बताउँछन् । खेलबाटै सफलता मिलेकाले यसबाट अलग रहन नसकिने उनको भनाइ छ ।

“सन्‍न्यास लिइसकेपछि बाँकी जीवन प्रशिक्षकको भूमिकामा बिताउनेछु । मैले जीवनमा जे-जति पाएँ, सबै खेलकुदबाटै पाएँ । त्यसैले खेलबाट टाढा रहन सकिन्‍न । नेपाल पुसिल क्लबले पनि मलाई धेरै कुरामा सहयोग गरेको छ । त्यहीँ धेरै खेलाडीलाई प्रशिक्षण दिलाउनेछु,” मण्डेले भने । पिपल्स च्वाइस अवार्डका लागि आफूलाई जिताउन ‘ईसेवा’मार्फत भोट गरेर माया देखाइदिन उनले अनुरोध गरेका छन् । 
-तस्बिर : हरिशजंग क्षेत्री