काठमाडौं । प्रिमियर लिग क्लब आर्सनलले युरोपा लिग फुटबलमा सहज जित हात पारेको छ । बिहीबार राति भएको समूह चरणको अन्तिम खेलमा आर्सनलले जित निकालेको हो ।
आर्सनल शतप्रतिशत जित निकाल्दै युरोपा लिग फुटबलको नकआउट चरणमा प्रवेश गरेको छ । प्रिमियर लिगमा कमजोर बनेको आर्सनलले आयरल्याण्डको डुनडल्कलाई ४–२ गोल अन्तरले पराजित गर्दै समूह विजेता बनेको हो ।
जितसँगै आर्सनलले ६ खेलबाट १८ अंक जोड्दै समूह विजेता बनेको छ । पराजित डुनडल्कले कुनै खेलमा जित निकाल्न सकेको छैन ।
डुनडल्कको मैदानमा १२ औं मिनेटमा एडवार्ड एनकेइटाले गोल गर्दै आर्सनललाई अग्रता दिलाएका थिए । १८ औं मिनेटमा मोहमेद एल्नेनीले गोल गर्दै आर्सनलको अग्रता दोब्बर पारे ।
२२ औं मिनेटमा जोर्डन फ्लोरेसले गोल गर्दै डुनडल्कलाई २–१ को स्थितिमा ल्याए । ६७ औं मिनेटमा जोसेप विललकले गोल गर्दै आर्सनललाई ३–१ को अग्रता दिलाए । ८० औं मिनेटमा फोलारिन बालोगुनले गोल गर्दा आर्सनल ४–१ ले अघि रह्यो ।
८५ औं मिनेटमा घरेलु टोलीका सिन होआरेले गोल गरेपनि आर्सनल ४–२ ले विजयी भयो ।
