काठमाडौं । गाडीको सबैभन्दा माथिल्लो सिसामा लेखिएको छ, ‘बाबा गोकर्णेश्वर’ । त्यसको ठिक तल प्लेकार्डमा ‘गौशाला, एअरपोर्ट, सिनामंगल, कोटेश्वर, सातदोबाटो, तीनकुने, बल्खु’ । गाडी नम्बर बा५ख २७७२ । घडीको सुईले बिहानको १०ः१५ देखायो । गाडीमा यात्रु भरिभराउ छन् । पाइला टेक्ने ठाउँ पनि छैन । त्यसमाथि सहचालक अझै ‘पछाडि सर्नुहोस्, पछाडि सर्नुहोस्’ भन्दै कराउँछन् । कोटेश्वर हँुदै जाने बस कुर्न आधा घन्टाजस्तो समय लाग्छ । तबमात्रै यात्रा सुरू हुन्छ, बौद्धदेखिको सातदोबाटोसम्मको ।

बौद्ध, नयाँबस्तीमा बस्दै आएका कालिकोटका विष्णुदेव जैसी सातदोबाटो जान गाडी चढे । हुत्तिँदै गाडीमा झुन्डिएको डोरी समात्न पुगे । सिट सबै भरिभराउ । जसोतसो उभिएर गौशालासम्म आउन ३० मिनेट लाग्यो । बीचमा कोही ओर्लिए त कोही चढे । तर, यात्रुको संख्या थोरै भएन ।

१०ः५० मा सिनामंगल पुगेपछि जाम सुरू भयो । गाडीमा भिड । यताउता गर्ने ठाउँ छैन । “अब कतिबेरसम्म जाम हुने हो, उभिँदा–उभिँदा खुट्टा गलिसके,” उनले भने, “यात्रु कोचाएर के गर्न लाग्या होला ?”  गोकर्णेश्वर–बल्खु सडकखन्डमा सवारी हाँक्दै आएका रामेछापका दिलीप लामाले भने, “मिलेर बसौँ । अगाडि ट्राफिक छ । ढोका लगा भाइ, ट्राफिकले समात्छ ।” मुस्किलले ढोका लगाउँछन्, सहचालक ।

यहाँ सधैँको लामो सवारी जाम । केही यात्रु ‘ढिलो हुन्छ’ भन्दै झरे । ४० सिट क्षमताको गाडी ती यात्रु ओर्लँदा पनि खाली भएन । सिनामंगलदेखि कोटेश्वर पुग्न एक घन्टा लाग्यो । जडीबुटी–कोटेश्वर सडकखन्डमा बिहान–बेलुका कार्यालय समयमा सवारी जाममा नपरेको दिनै हुँदैन । कोटेश्वर भित्रिने र बाहिरिने सवारी ट्राफिक जाममा फसेकै हुन्छन् । कार्यालय समयमा यात्रुको चाप बढी हुन्छ । सडक चौडा भएपनि जाम हुन्छ नै ।

समस्या कोटेश्वरको मात्रै होइन, राजधानीका अधिकांश सडकमा जाम हुन्छ । मुख्यगरी थानकोट, कलंकी, कोटेश्वर, तीनकुनेमा सवारी बढी जाममा परेको देखिन्छ । चालक लामा बोले, “यो रुटमा दिनमा तीन टिपभन्दा बाहेक गाडी चलाउनै पाइँदैन । कमाइ धेरै हुँदैन । सबै समय जाममै बित्छ ।”

११ः४५ बज्यो । बल्ल–तल्ल गाडी गन्तव्यतिर बढ्यो ।

सवारी जाम कम गर्न नयाँ–नयाँ ट्राफिक मापदण्ड बनाएको महानगरीय ट्राफिक प्रहरी महाशाखाका प्रमुख एसएसपी जनक भट्टराई बताउँछन् । अहिले अनुगमन टोलीले सडक जामको अवस्थाबारे अध्ययन गरिरहेको उनले जानकारी दिए ।

ट्राफिक महाशाखाले नयाँ अनुसन्धान थालेको हो । अनुसन्धानपश्चात् प्रभावकारी योजना ल्याउने महानगरीय ट्राफिकको तयारी छ ।

“सडकमा बढ्दो सवारी चापका कारण हुने ट्राफिक जाम कम गर्न जडीबुटी, कोटेश्वर, तीनकुने, कलंकी ८ लेन सडकखन्डमा लेन प्रयोगमा जोड दिँदै आएका छौं,” उनले भने, “सवारीमा यात्रा गर्दा गाडीको क्षमताभन्दा बढी मानिस हालेको पाइएमा कारबाही पनि गर्दै आएका छौं ।”