काठमाडौं । अष्ट्रेलियाविरुद्धको तेस्रो तथा अन्तिम एकदिवसीय क्रिकेटमा भारतले जित निकालेको छ । बुधबार भएको अन्तिम एकदिवसीयमा भारतले अष्ट्रेलियामाथि १३ रनको जित निकालेको थियो ।
मानुका ओभलमा भारतले जितका लागि दिएको ३०३ रनको लक्ष्य अष्ट्रेलियाले ४९ ओभर ३ बलमा सम्पूर्ण विकेट गुमाउँदै २८९ रन बनायो । अष्ट्रेलियाका लागि कप्तान अरोन फिन्च र ग्लेन म्याक्सवेलले अर्धशतकीय पारी खेले ।
८२ बल खेलेका फिन्चले ७ चौका र ३ छक्काको सहयोेगमा ७५ रन बनाए । त्यस्तै ३८ बल खेलेका म्याक्सवेलले ३ चौका र ४ छक्काको सहयोगमा ५९ रन बनाए ।
बलिङतर्फ भारतका लागि शर्दुल ठाकुरले सर्वाधिक तीन विकेट लिए । त्यस्तै जस्प्रित भुम्राहाल र नटराजनले दुई/दुई विकेट लिए ।
यसअघि, टस जितेर पहिले ब्याटिङ गरेको भारतले निर्धारित ५० ओभरमा पाँच विकेट गुमाउँदै ३०२ रन बनाउन सफल भएको थियो । भारतका लागि हार्दिक पाड्या, कप्तान विराट कोहली र रविन्द्र जडेजाले अर्धशतकीय पारी खेले । ७६ बल खेलेका पाड्याले ७ चौका र १ छक्काको सहयोगमा ९२ रनको योगदान गरे ।
त्यस्तै ७८ बल खेलेका कोहलीले ५ चौकाको सहयोगमा ६३ रन बनाए । कोहलीले आजको खेमला एकदिवसीय क्रिकेटमा कम इनिङसमा १२ हजार रन पूरा गर्ने खेलाडीको कीर्तिमान बनाएका छन् । उनले भारतीय टोलीका पूर्व खेलाडी सचिन तेन्दुलकरको नाममा भएको कीर्तिमान भङ्ग गरेका हुन् ।
भारतका लागि ५० बल खेलेका जडेजाले ५ चौका र ३ छक्काको सहयोगमा ६६ रन बनाउन सफल भएका हुन् । भारतका लागि सुभम गिलले ३३ रन बनाउँदा शिखर धावनले १६ रन बनाउन सफल भए ।
बलिङतर्फ अष्ट्रेलियाका लागि एस्टोन अगरले दुई विकेट लिए । त्यस्तै जोस हजेल, सेन अबोट र आदम जाम्पाले समान एक–एक विकेट लिए ।
एकदिवसीय सिरिज भने अष्ट्रेलियाले जिति सकेको थियो । यसअघिका दुई खेलमा सहज जित निकाल्दै अष्ट्रेलियाले सिरिज जितेको थियो ।
