काठमाडौं । सिजनको पहिलो एल क्लासिकोमा बार्सिलोना पराजित भएको छ । घरेलु मैदान क्याम्प नाउमा भएको खेलमा बार्सिलोना रियल मड्रिडसँग ३–१ ले पराजित भएको हो ।
शनिबार राती भएको खेलमा पाहुना टोली रियलको जितका लागि फेडेरिको भलभार्डे, सर्जिओ रामोस र लुका मोड्रिचले एक एक गोल गरे । बार्सिलोनाका लागि युवा खेलाडी अन्सु फातीले एक गोल फर्काएका थिए ।
खेलको पाँचौ मिनेटमा नै पाहुना टोली रियलले बार्सिलोनाविरुद्ध अग्रता लिएको थियो । करिम बेन्जेको पासमा फेडेरिको भालभार्डेले गोल गर्दै रियललाई १–० को अग्रता दिलाएका थिए । तर, त्यसको तीन मिनेट नबित्दै बार्सिलोनाले बराबरी गोल फर्काएका हो ।
खेलको ८ औं मिनेटमा फातिले गोल गर्दै खेल १–१ को बराबरीमा ल्याए । उनले जोर्डी अल्बाको पासमा गोल गर्दै खेल पहिलो हाफमा १–१ को बराबरीमा ल्याए । फातिको गोल एल क्लासिकोमा बार्सिलोनाले रियलविरुद्ध गरेको ४ सयौं गोल समेत हो । तर, दोस्रो हाफमा थप दुई गोल खाँदै बार्सिलोना पराजित भएको हो ।
६० औं मिनेटमा कप्तान रामोसले पेनाल्टीम गोल गर्दै रियललाई पुनः अग्रता दिलाए । रियलको फ्रिकिक बलमा पेनाल्टी क्षेत्रभित्र बार्सिलोनाका डिफेन्डर सेर्जिनो डेस्टले ह्यान्ड गरेपटि रेफ्रीले भीआरको सहायताबाट पेनाल्टी दिएको थियो । सोही पेनाल्टीमा रामोसले गोल गरेका हुन् ।
त्यसपछि खेलको अन्तिम मिनेटमा लुका मोड्रिचले गोल गरे । उनले रोड्रिगोको पासमा गोल गर्दै रियललाई ३–१ को सहज जित दिलाए । यस जितसँगै रियलले ६ खेलबाट १३ अंक जोड्दै शीर्ष स्थानमा उक्लिएको छ । पराजित बार्सिलोना भने पाँच खेलबाट ७ अंक जोड्दै १० औं स्थानमा रहेको छ ।