मुम्बई । अभिनेता शाहरुख खान र अभिनेत्री काजोलको सुपरहिट चलचित्र ‘दिलवाले दुल्हनिया ले जायेंगे’को २५ औं वार्षिकोत्सवको उपलक्ष्यमा लण्डनको लेसेस्टर स्क्वायरमा काजोल र शाहरुखको ब्रोन्ज (कास्य) मूर्ति अनावरण गरिने छ । चलचित्रका चर्चित सिनमध्ये एक दृष्यमा भएका राज र सिमरनलाई मूर्तिमा उतारिने छ ।
काजोल र शाहरुखको चलचित्रका पात्रको मूर्ति अन्य चर्चित नौ अन्तर्राष्ट्रिय चलचित्रहरु, ह्यारी पोटर, ल्वरेल एण्ड हार्डी, बग्स बन्नी, मेरी पपिन्स, मिस्टर बीन, प्याडिंगटन, वन्डर वुमन, ब्याटम्यान र जीन केली इन सिंगिन इन द रेनको साथमा सजिने भएको छ ।
हार्ट अफ लण्डन बिजनेस एलायन्सका डेस्टिनेसन बिजनेसका निर्देशक मार्क विलियम्सले यो खबरको पुष्टि गरेका छन् ।
निर्देशक मार्क भन्छन्,“अन्तराष्ट्रिय चलचित्रको शिर्षकमा शाहरुख र काजोललाई थप्न पाउँदा हामी निकै हर्षित छौं । ‘दिलवाले दुल्हनिया ले जायेंगे’ बलिउडको एक सफल र महत्वपूर्ण चलचित्र मध्ये एक हो । लेसेस्टर स्क्वायरमा खिचिएको पहिलो चलचित्रलाई यो यहाँ सामेल गराउन पाउँदा हामी उत्साहित पनि छौं ।”
उनी अगाडि थप्छन्,“यो मूर्ति बलिउडको विश्वव्यापी लोकप्रियता र सांस्कृतिक पुलको कामगर्ने चलचित्रको सम्मान स्वरुप सजाइने छ ।” सन् १९९५ अक्टोबर २० मा रिलिज भएको यस चलचित्रको निर्देशन आदित्य चोपडाले गरेका हुन् । - इन्डियन एक्सप्रेस