काठमाडौं । विगत तीन वर्षदेखि हरेक वर्ष आयोजना हुँदै आएको ‘हिमालयन आर्ट महोत्सव’ यो वर्ष आयोजना नहुने भएको छ । आयोजक टिम ई-आर्टस नेपालले प्रेस विज्ञप्ती जारी गर्दै ‘हिमालयन कला महोत्व २०२०’ आयोजना नहुने जानकारी दिएको हो ।
कोरोना महामारीका कारण यस वर्ष उक्त कला प्रदर्र्शनीको आयोजना गर्न नपाएको आयोजक टिम अत्यन्तै निराश भएको पनि विज्ञप्तीमा उल्लेख गरिएको छ । यद्यपि अर्को वर्ष स्थिती सामान्य हुनेमा आयोजक टिम आशावादि रहेको छ ।
नेपाली कलाको हरेक विधाका उत्कृष्ट संग्रह समेट्ने उद्देश्यका साथ सन् २०१७ मा यो महोत्सवको आयोजना गरिएको हो । जहाँ १५० जना भन्दा बढि कलाकारहरुको पेन्टिङ, पौवा, मूर्तिकला, इनस्टलेसन, फोटोग्राफ, प्रिन्टमेकिङ, सेरमिक कला महोत्सवमा प्रदर्शनीका लागि राखिने गर्दथे ।
पाँच दिनसम्म चल्ने उक्त कला महोत्सवमा कला प्रदर्शनीका साथै लाइभ सांगीतिक प्रस्तुती, प्यानल डिसकसन, किड्स आर्ट एजुकेसन र थिएटर तथा कत्थक नृत्यहरु पनि देखाइने गर्दथ्यो ।
आयोजकका अनुसार यो महोत्सवले नेपाली कलाकार र आन्तरिक कलेक्टर तथा ग्राहकका लागि थलो प्रदान गर्ने गरेको छ ।
ई-आर्टस नेपाल नेपाली कलाकार र कलालाई विश्व बजारमा पुर्याउने हेतूले सन् २०१० मा स्थापना भएको अनलाईन ग्यालरी हो ।
