काठमाडौं । अर्बन गर्ल(यूजी)ले आफ्नो ई–कमर्स प्लेटफर्मलाई सोसियल ई–कमर्स प्लेटफर्मको रुपमा अद्यावधीक गरेको छ । सन् २०१२ मा स्टार्टअप कम्पनीका रुपमा ई–कमर्स बजारमा प्रवेश गरेको यूजीले एप र वेब प्लेटफर्म विकास गरेको हो ।
यूजी बजार नामक सोसियल ई–कमर्स प्लेटफर्म अरु ई–कमर्स प्लेटफर्म भन्दा भिन्न छ । यूजी बजार नेपालकै पहिलो सोसल ई–कमर्स भएको यूजीको दाबी छ । कारण हो, यूजी बजारमा ई–कमर्समात्र छैन । ई–कमर्स यूजी बजारको ७ मोड्युलमध्ये एक हो ।
गरगहनाको बिक्री गर्दै सुरु भएको यूजीले मेकअप, घर सजावटका सामग्रीको अनलाइन व्यापार गर्दै केक उत्पादन, बिक्री तथा डेलिभरीसम्मको सेवा दिँदै आएको थियो । स्थापनाकै समयमा यूजीले सबै किनमेल आवश्यकता एकल बिन्दुबाट प्रदान गर्ने लक्ष्य लिएको थियो । जसको झल्को शुक्रबार लन्च भएको सोसियल ई–कमर्स प्लेटफर्मले दिन्छ ।
यूजीका सहसंस्थापक किरण तिम्सिना भन्छन्, “वर्षौंको शोध र विकासबाट हामीले यस्तो प्लेटफर्म जन्माएका छौं जसबाट अनलाइन सामान किन्नमात्र नभएर छुट्टै सामाजिक दुनियाँ महसुस गर्न सकिन्छ ।”
वि.सं. २०७४ मा यूजी केक नाम कम्पनी दर्ता भयो । अहिले त्यसलाई पनि अर्बन गर्ल इन्कर्पोरेटेड प्रालि समाहित गरिएको छ । यूजी बजारमार्फत् कम्पनीले ग्राहकको घरैमा सेवा र सुविधा पु¥याउने जनाएको छ । अत्यावश्यक खाद्य सामाग्री देखि मनोरञ्जनका सामान र घर परिवारको लागि आवश्यक सवै सामाग्रीको आपूर्ति यूजी बजारबाटै हुने कम्पनीको दाबी छ ।
यसकारण सोसियल ई–कमर्स प्लेटफर्म हो यूजी बजार
कम्पनीको अनुसार यूजी बजारलाई यसकारण सोसियल ई–कमर्स भनिएको हो कि यसका प्रयोगकर्ता एकअर्कासँग जोडिन सक्छन् । यहाँ एकअर्कालाई एड गर्न सकिन्छ, एकअर्काको सामान किन्न सकिन्छ । यो प्लेटफर्ममा युजर–टु–युजर सम्पर्क हुन्छ । यहाँ रहेका धेरै मोड्युलमध्ये ई–कमर्स एउटा हो ।
सोसियल ई–कमर्स बनाउने क्रममा हालका लागि ७ किसिमको मोड्युल तयार पारिएको छ । यी फिचरमा कम्पनीले ३ वर्षदेखि काम गरिरहेको बताइएको छ ।
१) अक्सन अफर मोड्युल: नेपालमा पहिलो पल्ट यूजी बजारमा स्वचालित किन्ने तथा बिक्री गर्ने सुविधा दिएएको छ । जसमा केही सामान बिक्री गर्न चाहने प्रयोकर्ताले आफ्नो सामानको न्युनतम मूल्यसहित बिक्रीमा राख्छन् र बोलकबोलबाट धेरै बोलि लगाउनेलाई बेच्छन् वा अफर दिन्छन् । यस्तो मोड्युलमा भारतको ईबेमा उपलब्ध छ ।
२) एचआर मोड्युल : यसमार्फत् व्यवसायले कर्मचारीको खोजी, आवेदन जाँच, उम्मेदवारको सर्टलिस्ट, अन्तर्वार्ताको समय तोक्ने र नतीजा सार्वजनिक गरेर यहीमार्फत् कर्मचारी छान्न पनि सक्छन् । यो जब प्लेसमेन्ट सर्भिस हो ।
३) अटोमोबाइल मोड्युल: यो सुविधामा अटोमोबाइल खोज्न, रिभ्यु हेर्न तथा गर्न, बुकिङ तथा टेस्ट ड्राइभ गर्न सकिन्छ । यो सेक्सनमा विशेषताका आधारमा दुई सवारीलाई दाँज्न पनि सकिन्छ ।
४) ई–कमर्स मोड्युल : यो सेक्सन अन्य ई–कमर्स प्लेटफर्म जस्तो हो । जहाँ सम्पूर्ण आवश्यक वस्तु छानेर किन्न सकिन्छ ।
यसमा विक्रेताले आफ्नो उत्पादन बिक्रीमा राख्न, बिक्री निरीक्षण गर्नलगायत काम गर्न सक्छन् । खरिदकर्ताले पनि अन्य ई–कमर्स प्लेटफर्ममा झैं खरिदको सुविधा पाउँछन् ।
५) सोसियल कमर्स मोड्युल: यो सामाजिक सञ्जाल झैं हो । यसबाट एकअर्कासँग साथी बन्न सकिन्छ र एक अर्कालाई गिफ्ट पनि दिन सकिन्छ ।
६) क्विज एन्ड कन्टेस्ट मोड्युल : यसमा प्रयोगकर्ताले आफ्नै क्विज तथा कन्टेस्ट राख्न सक्छन् । जहाँ अरु प्रयोगकर्ताले आवेदन दिन सक्छन् ।
७) टिकेट प्लेटफर्म : यो मोड्युल प्रयोग गरेर विभिन्न गतिविधि आयोजकले अनलाइन टिकट बिक्रीमा राख्न सक्छन् ।