काठमाडौं । काठमाडौं उपत्यकामा पछिल्लो २४ घण्टामा अहिलेसम्मकै धेरै ६२ जना कोरोना संक्रमित थपिएका छन् । यसअघि काठमाडौंमा उपत्यकामा एकदिनमा सबैभन्दा धेरै ५३ कोरोना संक्रमित थपिएका थिए ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार पछिल्लो २४ घण्टामा ६२ जनामा कोरोना भाइरसको संक्रमण देखिएको जानकारी दिए । उनले काठमाडौंका ४८, भक्तपुरमा १३ र ललितपुरमा एक जना कोरोना संक्रमित थपिएको बताए ।
राष्ट्रिय जनस्वास्थ्य प्रयोगशालामा गरिएको परीक्षणमा काठमाडौका ३८ जना र भक्तपुरका ११ जनामा कोरोना संक्रमण देखिएको उनले जानकारी दिए । उनका अनुसार त्रिवि शिक्षण अस्पतालमा गरिएको परीक्षण काठमाडौंका पाँच जनामा कोरोना देखिएको छ ।
नेपाल प्रहरी अस्पतालमा गरिएको परीक्षणमा भक्तपुरका एक जना कोरोना संक्रमित थपिएका छन् । स्टार अस्पतालमा गरिएको पीसीआर परीक्षणमा काठमाडौका दुई जना र भक्तपुरका एक जनामा कोरोना देखिएको छ ।
विआइ एच ल्याबमा गरिएको परीक्षणमा काठमाडौंका तीन जनामा कोरोना देखिएको छ ।
भक्तपुर कोरिया मैत्री अस्पतालमा गरिएको परीक्षणमा भक्तपुरका एक जनामा कोरोना संक्रमण देखिएको उनले जानकारी दिए । मंगलबार देशैभर २५९ जनामा कोरोना संक्रमण देखिएको छ भने कुल कोरोना संक्रमितको संख्या २१ हजार ९ पुगेको मन्त्रालयले जनाएको छ ।
