एजेन्सी । कोभिड–१९ विश्व महामारी चलिरहेको अवस्थामा मास्क लगाउन नमान्नु मापसे गरी सवारी चलाउनु जत्तिकै सामाजिक रुपमा अस्वीकार्य भएको विज्ञहरुले बताएका छन् ।  यसरी उनीहरुले सार्वजनिकस्थलमा रहेका बेला आफू र आफ्ना वरपरका सबैको सुरक्षाका निम्ति भए पनि अनिवार्यरुपमा मास्क लगाउन आग्रह गरेका हुन् । 

पछिल्लो समय अमेरिका, बेलायत, फ्रान्सलगायत विभिन्न पश्चिमी मुलुकमा नागरिकहरु मास्क लगाउनेविरुद्ध रहेको पाइएको छ ।  केही दिन अगाडि मात्र फ्रान्समा एक बस चालकको यही विषयमा यात्रुसँग विवाद हुँदा उनीमाथि भएको कुटपिटका कारण ज्यानै गुमाउनु परेको थियो ।  सो घटनाले अहिले पूरै देशलाई स्तब्ध बनाइदिएको छ जबकि फ्रान्समा धेरै समय अगाडि नै सार्वजनिकस्थलमा अनिवार्य मास्क लगाउनुपर्ने नियम जारी गरिएको थियो  । 

यसरी सरकारले बारम्बार अनुरोध गरे पनि अझै धेरैले मास्कलाई झन्झट र अनावश्यक मान्दै आएको पाइएको छ ।  अमेरिकामा मात्र यसका कारण थुप्रै दुर्घटना घटिसकेका छन् जहाँ राष्ट्रपति ट्रम्प नै पहिले मास्क लगाउने विरुद्धमा थिए ।  उनले आइतबार मात्र पहिलोपटक सार्वजानिक स्थलमा मास्क लगाएका हुन् । 
त्यस्तै मास्क नलगाइ र्यालीमा समेत सहभागी भएका ब्राजिलका राष्ट्रपति जैर बोल्सेनेरोलाई पनि यसअघि अदालतले नै आदेश दिनु परेको थियो जो यतिबेला संक्रमित अवस्थामा छन् । 

यसरी मानिसहरु सामाजिक दुरी र नियमित हात धुने कुरालाई गम्भीर रुपमा लिए पनि मास्क लगाउनुका फाइदाबारे अझै शंकामा छन् भने उचित नीतिको अभावमा त्यस्ता देशहरु, कोभिडलाई नियन्त्रण गर्नमा पछाडि परिरहेका छन् । यसको उदाहरण पश्चिमी मुलुकका सार्वजानिक बसमै प्रशस्त देख्न सकिने विज्ञहरुले बताएका छन् जहाँ धेरैले मास्क लगाउनुपर्ने नियम बेवास्ता गरिरहेका हुन्छन् । 

यसअघि स्वास्थ्यविद्हरुले दशौँ हजार मानिसको ज्यान जोखिममा नपारी अर्थतन्त्र खुलाउनु छ भने सबैले अनिवार्य मास्क लगाउनैपर्ने  बताएका थिए ।  तर मास्क लगाउँदा आफूसँगै अरुलाई पनि बचाउन सकिने थुप्रै प्रमाण प्राप्त भइसकेतापनि धेरैले यसलाई अस्वीकार गरिरहेका छन् ।  गत जुनमा विश्व स्वास्थ्य संगठनले कोरोना भाइरसको संक्रमण तीव्र भएका क्षेत्रमा सबैले कपडाको भए पनि मुख छोप्न सुझाव दिएको थियो । 

अमेरिकाको रोग नियन्त्रण एवम् रोकथाम केन्द्रले पनि सार्वजनिक स्थलमा कपडाले नाकमुख छोप्नैपर्ने बताउँदै आएको छ ।  यसअघि युनिभर्सिटी अफ वासिङटन इन्सटिटिउटले गरेको अध्ययनमा ९५ प्रतिशत अमेरिकीहरुले मास्क लगाएर हिँड्ने गरेमा आगामी अक्टोबरसम्म ३३ हजारलाई मृत्युबाट जोगाउन सकिने बताएको थियो । 

तर जानेर बुझेर पनि आफ्नोसहित अरुको ज्यान जोखिममा पार्नेहरु भने वास्तवमै सामाजका अपराधीसरह भएको यसअघि हलिउड कलाकार टम ह्याङ्कसले बताएका हुन् ।  सार्वजनिक स्थलमा मास्क लगाउन नमान्नेहरुप्रति आफ्नो कुनै सम्मान नरहेको उनले बताएका थिए जो कोरोना संक्रमित भइ यतिबेला ठीक भइसकेका छन् ।

त्यस्तै माइक्रोसफ्ट कम्पनीका मालिक बिल गेट्सले पनि अमेरिकामा अझै धेरैले कोरोनालाई गम्भीर रुपमा नलिएको र मास्क नलगाइ हिँड्ने गरेकाप्रति ठूलो दुःख व्यक्त गरेका हुन् ।  सीएनएन