काठमाडौं । नेकपा स्थायी कमिटी सदस्यहरूले पार्टी एकताको चुँडिन लागेको डोरी जोडिएको बताएका छन् । पार्टी एकतालाई दुर्घटनामा पर्नबाट जोगाउँदै संवादको प्रकृयालाई अघि वढाउन भूमिका खेल्ने सबैलाई धन्यवाद पनि दिएका छन् ।
पाँच नम्बर प्रदेशका मुख्यमन्त्री शंकर पोखरेलले सामाजिक सञ्जाल फेसबुकमा स्ट्याटस लेख्दै उनले निषेध र उपेक्षाले पार्टी एकताको रक्षा हुन नसक्ने बताएका हुन् ।
“पार्टी एकताको चुँडिन लागेको डोरी अध्यक्षद्वयले जोड्ने र त्यसमा अन्य सबै कमरेडहरूको सकारात्मक साथसहयोग रहने विश्वासका साथ म आजै कार्यक्षेत्रमा (बुटवल) फर्किएको छु । हुने सबै धन्यवादको पात्र हुनुहुन्छ,” मुख्यमन्त्री पोखरेलले भनेका छन्, “पार्टी एकताले नै आजको शक्ति आर्जन भएको हो र पार्टी एकताको रक्षाबाट नै उज्यालो भविष्य सुनिश्चित हुन्छ ।”
उनले पार्टी एकताको रक्षाका लागि एकताको मुलमर्म र भावनाको अनुशरण गर्न आग्रह गरेका छन् । “निषेध र उपेक्षाले पार्टी एकताको रक्षा हुन सक्दैन । नेपालभारत बीचको सीमा विवाद समाधान गर्ने उद्देश्यकासाथ नेपालका सबै भूभाग समेटिएको नक्सा प्रकाशन पछि मुलुक सम्वेदनशील मोडमा उभिएको छ,” उनले भनेका छन् ।
सबै राजनीतिक दलको समर्थनमा संविधानको अनुसूचीमा त्यसलाई समावेश गरिएको भन्दै यो ऐतिहासिक कदम नेपाली स्वाभिमान र अखण्डताको रक्षाको राष्ट्रिय सङ्कल्प भएको उनको भनाइ छ ।
छिमेकी भारत त्यसवाट आक्रोशित बनेका बेलामा त्यसको नेतृत्वगर्ने प्रधानमन्त्रीलाई सिङ्गो राष्ट्र एकभएर साथ दिने बेलामा पार्टीमै विवाद देखिनु राम्रो नभएको बताएका छन् ।
“यसप्रति सबैको ध्यान अवश्य गएको हुनुपर्छ,” उनको भनाइ छ, “यतिबेला जनता कोभिड–१९ र बाढी पहिरोको त्रास र पीडामा छन् । उनीहरूको सेबागर्नु हामी सबैको कर्तव्य हो । अध्यक्षद्वयले परिस्थितिको गम्भीरतालाई मननगरी चालु बैठकलाई एक साताका लागि स्थगन गर्नुभएको छ ।”
उनले जारी धर्ना, जुलुस र वादप्रतिवाद रोक्न आग्रह गरेका छन् । “धर्ना, जुलुस र वादप्रतिवादका सबैखाले गतिविधिहरू स्थगन गरेर पीडामा रहेका जनताको सेवामा जुटौँ । बेमौसमी बाजाको कर्कश धुन कसैलाई प्रिय हुँदैन,” उनले अपिल गरेका छन् ।
