काठमाडौं । चलचित्र ‘सुन्तलीलाई भगाई लग्यो झिल्केले’ ले उत्साहजनक व्यापार गरेको छ । गत शुक्रबारबाट प्रदर्शनमा आएको चलचित्र ‘सुन्तलीलाई भगाई लग्यो झिल्केले’ ले अपेक्षित व्यापार गरेको उक्त चलचित्रका निर्देशक ऋषीराज आचार्यले जानकारी दिए । 

“चलचित्रले राम्रो व्यापार गरिरहेको छ । शुक्रबार सन्तोषजनक व्यापार गरेको चलचित्र शनिबार निकै राम्रो व्यापार गर्यो,” निर्देशक आचार्यले भने,“माउथ पब्लिसिटीले शनिबार काडमाडौं उपत्यका र बाहिर सबै हल तथा मल्टिप्लेक्स र क्युएफएक्स हरुमा हाउसफुल भयो ।”

‘सुन्तलीलाई भगाई लग्यो झिल्केले’ कि नायिका सुरजनी केसीले आइतबार बिहान पनि हलहरु हाउसफुल भएको बताइन् । “कस्तो होला भनेर सुरुमा त डर लागिरहेको थियो,” केसीले भनिन्,“रिलिज भएपछि सबैले राम्रो भन्नु भएको छ । चलचित्र हेर्नेहरुले कसैले पनि नराम्रो भन्नु भएको छैन ।”

कुल ६५ लाखमा बनेको चलचित्रले लगानी उठाउनेमा आफू ढुक्क भएको निर्देशक आचार्यले बताए । चलचित्रमा शुसान्त कार्की, सुशील सिटौला, शिशिर भण्डारी र सुरजनी केसीको मुख्य अभनिय रहेको छ । 

चलचित्र विस्तारै लोप हुँदै गएको ‘जार प्रथा’मा आधारित छ । ओखल ढुङ्गा र रामेछापका दुर्गम गाउँमा छायांकन गरिएको छ ।