काठमाडौं । प्रहरी महानिरीक्षक (आईजीपी) ठाकुरप्रसाद ज्ञवालीले कोरोना संक्रमणबाट आफूहरू नआत्तिएको बताएका छन् । बाह्रखरीसँग संक्षिप्त कुराकानी गर्दै आईजीपी ज्ञवालीले आफूहरू जस्तोसुकै कठिन परिस्थितिमा पनि कर्तव्यबाट विमुख नहुने बताएका हुन् ।

समाजमा प्रहरी जानैपर्ने र समाजमा जाँदा जोखिम स्वभाविक भएको आईजीपी ज्ञवालीको भनाइ छ । उनले भने, “प्रहरीले ठूला–ठूला जोखिमको सामना गर्दै यहाँसम्म आइपुगेको हो । संक्रमित हुँदा मनोवैज्ञानिक रुपमा केही असर पर्दैन भन्ने त होइन । तर यसलाई सावधानीपूर्वक सामना गर्नुको विकल्प छैन । संकटमै हो प्रहरी फ्रन्टलाइनमा उभिने । यस्तोमा मैदान छाडेर भाग्दैनौं ।”

प्राप्त स्वास्थ्य सामग्रीको अधिकतम प्रयोग गर्दै प्रहरी कर्मचारी कार्य क्षेत्रमा खटिएको र राष्ट्रप्रतिको जिम्मेवारी उच्च मनोबलका साथ गर्न निर्देशन दिइएको ज्ञवाली बताउँछन् । सरकारले निर्देशन गरेको लकडाउनको पालनासँगै शान्ति सुरक्षालगायत अन्य जिम्मेवारी पनि प्रहरीले कुशलतापूर्वक निर्वाह गरिरहेको उनको भनाइ छ ।

देशभर सोमबार साँझसम्म १६ प्रहरीमा कोरोना संक्रमण देखिएको छ । प्रहरी प्रवक्ता डीआईजी नीरज शाहीका अनुसार बारामा ७, धनकुटामा २, काठमाडौंमा २, धनुषामा २, कपिलवस्तुमा २ र बाँकेमा एक गरी १६ जना प्रहरीमा कोरोना भाइरसको संक्रमण देखिएको छ ।

यसबाहेक कालीमाटीका २३१ प्रहरीको आरडीटी परीक्षणको नतिजा आउन बाँकी छ । प्रहरी पनि कोरोनाको जोखिममा रहेको बताउँदै प्रवक्ता शाहीले स्वास्थ्य सुरक्षाका मापदण्डलाई अंगीकार गरेर प्रहरी कार्यक्षेत्र र व्यारेकमा बसेको बताए । यसबाहेक समस्या देखिएका प्रहरी कर्मचारीको स्वास्थ्यजाँचलाई समेत निरन्तरता दिइएको उनले बताए ।