कास्की । बन्दाबन्दीको सदुपयोगसहित पत्रकारको क्षमता अभिवृद्धि गर्ने उद्देश्यले नेपाल पत्रकार महासंघ कास्कीले नियमित सञ्चार सम्बन्धित डिजिटल अभिमुखीकरण (ओरेन्टिएसन) सञ्चालन गर्दै आएको छ ।
असहज परिस्थितिमा कसरी पत्रकारिता गर्ने भन्ने विषयमा विषयगत विज्ञको भर्चुअल उपस्थितिमा आठौँ शृङ्खला सम्पन्न भएको महासंघ कास्कीका अध्यक्ष दीपेन्द्र श्रेष्ठले जानकारी दिए । उनले कोरोना त्रासमा कसरी समाचार सङ्कलन गर्ने तथा कुनकुन विषयमा ध्यान दिने भन्ने विषयमा वैकल्पिक अवस्थाको खोजी गरेर पत्रकारलाई डिजिटल अभिमुखीकरण सञ्चालन गरिएको बताए ।
श्रेष्ठले भने, “हामीले वैशाख २२ गते (मे ३) विश्व प्रेस स्वतन्त्रता दिवसको अवसरबाट अनलाइन अभिमुखीकरण सुरु गरेका हौं, पहिलो दिन नेपाल पत्रकार महासंघका केन्द्रीय अध्यक्षले गोविन्द आचार्यबाट ‘कोरोना सङ्क्रमण र हाम्रो चुनौती’ विषयमा भर्चुअल ओरेन्टिएसन भयो, त्यसयता आठौं शृङ्खला सम्पन्न भइसकेका छन् ।” श्रेष्ठले बन्दाबन्दीको समयभरि पत्रकारितासम्बन्धी सम्पूर्ण विषयको खोजी गर्दै विषय विज्ञबाट अन्तक्र्रियात्मक रुपमा ओरेन्टेशन सञ्चालन गरिँदै आएको बताए । -रासस
