बष्टन(अमेरिका) । कोरोनाभाइरसको महामारीले न्यू योर्क सहर ठप्प भए पनि त्यहाँ बस्ने नेपाली बुद्ध धर्माबलम्बीले फेसबुक लाइभमा सहभागी भएर बुद्ध जयन्ती मनाएका छन् ।  गत मे ७ मा मनाइएको २६ सय ४४ औँ बद्ध जयन्तीको फेसबुक लाइभ कार्यक्रम युनाइटेड शेर्पा एसोसियसनले आयोजना गरेको थियो ।

फेसबुक लाइभमा अमेरिका, नेपाल, भारतको सिक्किम दार्जिलिङ र यूरोपका विभिन्न देशहरुबाट करिब ६ हजार बुद्धधर्माबलम्बी तथा बुद्ध प्रेमीहरुको सहभागिता रहेको एसोसियशनका अध्यक्ष उर्गेन शेर्पाले बताए । कार्यक्रमको सञ्चालन सामाजिक दूरी तथा रोकथामका अन्य उपाय कायम गर्दै गरिएको थियो ।

कार्यक्रममा लोपेन ग्यूर्मे छोडकबाट बुद्ध जीवनी र बोधिचर्यावतारबारे शेर्पा भाषामा प्रवचन, बुद्ध उपदेश र पञ्चशीलबारे खेन्पो ङवाङ सांगेबाट नेपाली भाषामा प्रवचन र बुद्ध जयन्तीबारे आचार्य एडी शेर्पाको प्रवचन रहेको थियो । कार्यक्रममा न्यू योर्कका स्थानीय जनप्रतिनिधि काउन्सिल मेम्बर डानियल ड्रोम, न्यू योर्क टाइम्सका रिपोर्टर तथा कोलम्निष्ट ड्यान ब्यारी र रोटरी क्लव क्वीन्सका अध्यक्ष नवराज केसीको पनि उपस्थिति थियो ।