काठमाडौं । कोरोना भाइरस (कोभिड–१९)को जोखिम कम गर्न भन्दै सरकारले लकडाउन घोषणा गरेपछिको असहज परिस्थितीमा केही कलाकारले सहयोग गरेका छन् ।
कसैले सरकारले स्थपना गरेको कोरोना नियन्त्रण कोषमा सहयोग गरेका छन् भने केहीले आफ्नै कार्य क्षेत्रका अभावमा रहेका व्यक्तिलाई सहयोग गरेका छन् ।
कोरोना नियन्त्रण कोषमा निर्माता अर्जुनकुमारले ५० हजार सहयोग गरेका छन् भने नायिका वर्षा राउतले एक लाख रुपैयाँ सहयोग गरेकी छिन् ।
अर्जुनकुमार र वर्षाले कोरोना नियन्त्रण कोषमा सहयोग गर्दा चलचित्र छक्का पञ्जाको युनिटले आफ्नै क्षेत्र (चलचित्र)मा काम गर्ने स्पट व्वाईलाई सहयोगको घोषणा गरेको छ । दीपकराज गिरी, केदार घिमिरे, जितु नेपाल र दीपाश्री निरौलाले संयुक्त रुपमा १ लाख १० हजार रुपैयाँ सहयोग गरेका हुन् ।
छक्का पञ्जा युनिटले सहयोग घोषणा गरेकै दिन नायक पल शाहले पनि सहयोग गर्ने वचन दिए । उनले पनि छक्का पञ्जा युनिटले जस्तै लकडाउनका कारण दैनिक मजदुरी गुमाएका चलचित्र प्राविधिकलाई ५ लाख रुपैयाँ सहयोग गर्ने घोषणा गरेका हुन् ।
दैनिक मजदुरी गरेर घर चलाउने चलचित्र प्राविधिकहरु लकडाउन कारण समस्यमा रहेको भन्दै दीपकले नयाँ योजनासहितको सहयोग सुरु गरेका थिए । दीपकका अनुुसार लकडाउनले असर गर्ने चलचित्र प्राविधिकको संख्या २५ देखि ३० रहेको छ ।
यस्तै नायिका प्रियंका कार्की र नायक आयुषमान देशराज जोशीले लकडाउनमा खान नपाएका जनावरका लागि भन्दै एक लाख रुपैयाँ सहयोगको घोषणा गरेका छन् । एक कचौरा पानी र एक कचौरा खाना जनावरका लागि घरबाहिर राख्ने अभियानका लागि सहयोग स्वरुप आयांका फाउन्डेसनले एनिमल नेपाललाई एक लाख रुपैयाँ सहयोग गरेको हो ।
एनिमल नेपालले छाडा छोडिएका जनावरका लागि एक कचौरा खाना र एक कचौरा पानी आगनमा राख्न आग्रह गरेको छ ।