बर्लिन । जर्मनीको सबभन्दा ठूलो फुटबल रंगशाला वेस्टफलेन स्टेडियममा कोरोना उपचार केन्द्र स्थापना गरिएको छ । उक्त स्टेडियममा शनिबारदेखि कोरोनाको उपचार थालिने बोरुसिया डर्टमन्ड फुटबल टोलीले जारी गरेको विज्ञप्तिमा भनिएको छ ।
"भोलि शनिबारदेखि सुरु हुन्छ । उत्तरी क्षेत्र 'सिग्नल इडुना पार्क' मा फुटबल होइन तर, कोरोना भाइरसको आशंका भएका, कोरोनाको लक्षण देखिएका र कोरोना संक्रमित पुष्टि भएकाहरुको उपचार सुरु हुन्छ," विज्ञप्तिमा भनिएको छ ।
डर्टमन्डका प्रबन्ध निर्देशक हान्स-जोआचिम वाट्के र कार्स्टेन क्रामरले उक्त क्षेत्रमा मानिसलाई सहयोग गर्ने उद्देश्यले उक्त सुविधा दिइएको बताए ।
"हाम्रो रंगशाला सहरको केन्द्रमा छ । डर्टमन्ड र आसपासका हरेकका लागि पायक पर्ने स्थानमा छ । प्राविधिक र भौतिक रुपमा राम्रो अवस्थामा राख्ने सबैलाई धन्यवाद । यहाँ कोरोना सम्भावित र यससँग सम्बन्धित लक्षण देखिएका र ज्वरो आएका सबैको यहाँ उपचार गरिनेछ," विज्ञप्तिमा भनिएको छ ।
उनले सकेको हरेक कुरा सहयोग गर्ने आफ्नो कतर्व्य र इच्छा रहेको बताइएको छ । -सीएनएन
