पर्सा । कोभिड-१९ को सङ्क्रमणलाई रोक्न देशव्यापी लकडाउन अवज्ञा गर्ने ३५२ भारतीय नागरिकलाई आज पर्सा प्रहरीले वीरगन्जबाट नियन्त्रणमा लिएको छ । वीरगन्ज नाकाबाट भारततर्फ जाँदै गरेका पाँच महिला, ११ बालबालिका र ३३६ पुरुषलाई प्रहरीले नियन्त्रणमा लिएको हो ।
देशको विभिन्न स्थानमा रही काम गर्दै आएका भारतीय नागरिक वीरगन्ज नाकाबाट भारततर्फ जाने क्रममा बिहान १ बजे नियन्त्रणमा लिएको जिल्ला प्रहरी कार्यालय पर्साका प्रहरी नायब उपरीक्षक गौतम थापाले जानकारी दिए । उनले नियन्त्रणमा लिइएकालाई हाल वीरगन्जको आदर्शनगरस्थित ठाकुरराम बहुमुखी कम्यापसको एजुकेसन भवनमा राखिएको बताए ।
काठमाडौं, चितवन, मकवानपुर, पोखरालगायत स्थानमा रही काम गर्दै आएका भारतीयहरु मालवाहक वाहनमा लुकिछिपी तथा पैदल यात्रा गर्दै वीरगन्जसम्म आइपुगेको प्रहरीले जनाएको छ । गएरातिदेखि नै प्रहरी नियन्त्रणमा रहेकालाई आदर्शनगर ग्रिन सिटी सामुदायिक सेवा केन्द्रले खानाको प्रबन्ध गरेको छ । नियन्त्रणमा रहेकालाई जिल्ला सुरक्षा समन्वय समितिको आज बस्ने बैठकले के कारबाही गर्ने विषयमा निर्णय गर्ने प्रहरीले जनाएको छ । -रासस
