काठमाडौं । जल तथा मौसम विज्ञान विभाग अन्तर्गत मौसम पूर्वानुमान महाशाखाले चितवनको माडी क्षेत्रको भु-भागमा रातीदेखि भारी बर्षा भइरहेकाले विशेष सतर्कता अपनाउन सर्वसाधारणमा अनुरोध गरेको छ ।
छरछरे, कल्याणपुर लगायतका केन्द्रमा बर्षाले खतराको विन्दु समेत पार गरिसकेकाले विशेष सतर्कता अपनाउन आग्रह गरेको हो ।
मौसम विज्ञान विभागले जारी गरेको बिशेष बाढी सूचनामा भू–उपग्रह तस्बिरको आधारमा गरिएको वैज्ञानिक विश्लेषणका आधारमा विशेषगरी बाग्मती र पूर्वी राप्ती साथै चुरे पर्वतबाट सुरु हुने खोलाहरु कन्काई, सप्तकोशी, कमला र नारायणी नदी जलाधारका अन्य नदी प्रणालीमा समेत रातभर भारी बर्षा भएकाले भूकम्पबाट प्रभावित दोलखादेखि पोखरासम्मका पहाडी कमजोर भूभागमा पहिरो जान सक्ने चेतावनी दिएको छ ।
वरिष्ठ मौसमविद् सुजन सुवेदीका अनुसार आज देशभर बर्षा भइरहेको छ । केही भागमा भारी बर्षा भएको छ । उनले नारायणी नदीमा खतराको संकेत देखा परेकाले विशेष सतर्कता अपनाउन भनेको समेत जानकारी गराए ।