काठमाडौं । लकडाउनको पहिलो दिन साँझपख सर्वसाधारण खाद्यान्न खरिदका लागि बाहिर निस्किएका छन् । आज साँझ दैनिक उपभोग्य खाद्यान्न एवं औषधि खरिदका लागि सर्वसाधारण बाहिर निस्किएका हुन् । यद्यपि खाद्यान्न पसल ज्यादै न्यून मात्रामा खुलेका छन् । फाट्टफुट्ट खुलेका औषधि, खाद्यान्न, डेरी र फलफूल पसलमा सर्वसाधारण होसियारीका साथ सामान किनमेल गरिरहेका थिए ।
कतिपय पसलमा मानिसहरूले एक मिटरको दूरी कायम गरेका थिए भने कतिपय पसलमा पहिलकै जस्तो दूरी कायम गरेका थिएनन् । व्यवसायी भने दूरीमा रहेर बस्न आग्रह गर्दै थिए । एक व्यवसायीले भनिन्, ‘दूरी कायम गरेर बसिदिनु होला, आफ्नै लागि हो, सबैलाई पालैपालो भएको सामान दिन्छु ।’
आज बिहानैदेखि खाद्यान्न, दूधका पसल बन्द भएपछि उनीहरू साँझको समयमा बाहिर निस्केका हुन् । दिउँसो औषधि पसल खुलेका थिए । सरकारी पेट्रोल पम्प खुला रहे पनि निजी भने बन्द थिए । जथाभावी हिँड्न पनि प्रहरीले कडाइ गरेको थियो ।
काठमाडौं उपत्यकासहित देशभरका बैंक तथा वित्तीय संस्थाका कार्यालय बन्द थिए भने एटीएम खुला थिए । बजारमा दिउँसो खानेपानीको ट्याङकर, पानीको जार बोकेका गाडी, एम्बुलेन्स, फोहोर बोक्ने गाडी र केही निजी सवारीसाधन चलेका थिए ।
