विश्व नै कोरोनाको महामारीमा चपेटिएका बेला अमेरिकन पप गायिका ब्रिटनी स्पेअर्स सहयोगी भएर आएकी छन् ।

ब्रिटनीले शुक्रबार इन्स्टाग्राममा भिडियो सेयर गर्दै यो महामारीको चपेटामा परिरहेका आफ्ना ३ जना फ्यानलाई आवश्यक सहयोग प्रदान गर्न तयार भएको बताएकी हुन् । 

अहिले खाद्यान्नदेखि हरेक कुराको अभाव भइरहेका बेला आफ्ना ३ जना फ्यानलाई अत्यावश्यक कुरा उपलब्ध गराउने बताइन् । 

“विश्व अहिले यस्तो कठिन समयबाट गुज्रिरहेको छ, चाहे खाने कुरा होस् वा तपाईंको बच्चाको डाइपर होस्, मलाई डीएम गर्नुहोस् म तपाईंलाई मद्दत गर्नेछु,” उनले भिडियोमा भनिन् ।

ब्रिटनीको यो कार्य अहिले महामारीको चपेटामा सहयोग गर्ने उद्देश्यले सुरु भएको अनलाइन अभियान #DoYourPartChallenge अन्तर्गत पर्छ । जसमा हरेकले आफ्नो तर्फबाट गर्न सक्ने सहयोगका बारेमा जानकारी दिँदै अरु ३ जनालाई पनि नोमिनेट गर्नुपर्नेछ । 

जसअन्तर्गत ब्रिटनीले विल स्मिथ, केट हडसन र प्रेमी साम असगारीलाई नोमिनेट गरेकी छन् ।

ब्रिटनीका साथै जस्टिन टिम्बरलेक, डोनाटेला भिर्साचे र थुपै एनबीए प्लेयर्सले पनि विभिन्न स्कुल, अस्पताल र फुड बैंकलाई आर्थिक सहयोग गरेका छन् । (सिएनएन)