काठमाडौं । नेपाली कांग्रेसका सभापति शेरबहादुर देउवाले छायामन्त्रीहरुलाई आफूले जिम्मेवारी सम्हालेको मन्त्रालयमा भएको भ्रष्टाचार बाहिर ल्याउन निर्देशन दिएका छन् ।
छाया मन्त्रीमण्डलको पहिलो बैठकमा छाया मन्त्रालयका संयोजकहरुले आफूले जिम्मेवारी पाएको मन्त्रालयले गरिरहेका गतिविधिबारे ब्रिफिङ् गरेका थिए ।
बैठकमा सम्बन्धित मन्त्रालयमा भएको भ्रष्टाचारको सदन, सडक र संगठनबाट सशक्त प्रतिकार गर्ने निर्णय भएको सांसद डा. डिला संग्रौलाले जानकारी दिएकी छन् । उनका अनुसार संसदीय समितिमा पनि छाया सभापती बनाउने, विज्ञ राख्ने, हरेक इस्यु उठ्दा विज्ञसँग छलफल परामर्श गर्नेबारे बैठकमा छलफल छ ।
गत जेठमा गठन भएको मन्त्रीमण्डलको बैठक आइतबार बसेको हो ।
“जसले जुन मन्त्रालय हेर्नुभएको छ । त्यसलाई गहिरिएर अध्ययन गर्नुपर्ने र त्यहाँ भएका काण्डहरू रोक्न र जनता समक्ष लिएर आउनलाई अझ गहिरो अध्ययन गरी प्रतिवेदन बुझाउन पनि निर्देशन दिइएको छ,” देउवाले बैठकमा भने ।