काठमाडौं । हिमालयन बैंकमा करिब १५ वर्षदेखि निरन्तर अध्यक्ष रहँदै आएका मनोजबहादुर श्रेष्ठ बाहिरिएका छन् । बैंकको बुधबार सम्पन्न २७ औं वार्षिक साधारण सभापछि श्रेष्ठ बाहिरिएका हुन् । साधारण सभाले सञ्चालक समिति सर्वसम्मत चयन पनि गरेको छ ।
सञ्चालक समितिमा संस्थापक शेयरधनीबाट प्रतिनिधित्व गर्ने सदस्यहरू चयन भएका हुन् । पाँच जना नयाँ सदस्यमा प्रचण्डबहादुर श्रेष्ठ, फैजल एन ललानी, तुलसीप्रसाद गौतम, सुनिलबहादुर थापा र आशिष शर्मा छन् । थापा पूर्व वाणिज्य तथा आपूर्ति मन्त्री हुन् । यस्तै शर्मा पनि नयाँ सदस्यका रूपमा छानिएका हुन् ।
बैंक मर्जरमा नजाने, एफपीओ पनि जारी नगर्ने
साधारण सभामा बैंकका प्रमुख कार्यकारी अधिकृत अशोक शम्शेर राणाले बैंक मर्जरमा नजाने स्पष्ट पारे । सेयरधनीहरूको प्रश्नको जवाफ दिँदै उनले बैंकले एफपीओ पनि जारी नगर्ने बताए ।
उनले संस्थापकहरूको १५ प्रतिशत सेयर सर्वसाधारणमा रूपान्तरण गर्ने बैंकको योजना रहेको सुनाए । एफपीओमा जाँदा पाकिस्तानको हबिब बैंकको सेयर पनि ‘डाइलुट’ हुने भएकाले एफपीओ जारी गर्न नमिल्ने उनले बताए । अर्कातर्फ बिग मर्जरको कुरा चलिरहेका बेला बैंकले सम्भावित मर्जरका विषयमा नसोचेको पनि उनले बताए ।
प्रस्तावित लाभांश पारित
साधारण सभाले बैंकले प्रस्ताव गरेको लाभांश पारित गरेको छ । सभाले १० प्रतिशत बोनस सेयर र १२ प्रतिशत नगद लाभांश (कर सहित) वितरण गर्ने प्रस्ताव पारित गरेको हो । यो बोनस सेयरको वितरणपश्चात् बैंकको चुक्ता पुँजी ९ अर्ब ३७ करोड २२ लाख पुग्ने अध्यक्ष मनोजबहादुर श्रेष्ठले बताए ।
अध्यक्ष श्रेष्ठले २७ वर्षदेखि सेवारत हिमालयन बैंक नेपालको वित्तीय क्षेत्रको अग्रणी मध्येको सुरक्षित र भरपर्दो बैंक भएको उल्लेख गरे ।
बैंकले आव २०७५÷७६ अन्त्य सम्म १ खर्ब १३ अर्ब ९ करोड निक्षेप संकलन र ९८ अर्ब २० करोड ६३ लाख कर्जा प्रवाह गरेको जनाएको छ ।