काठमाडौं । उद्योग, वाणिज्य तथा आपूर्ति राज्यमन्त्री मोतीलाल दुगडले उद्यमी व्यवसायीहरू समृद्ध नभएसम्म देश समृद्ध हुन नसक्ने बताएका छन् ।
‘नेपाली उत्पादनहरूको विक्री तथा निर्यात र महिला उद्यमीहरूका अवसर र चुनौती’ विषयमा काठमाडौंमा शुक्रबार आयोजित कार्यक्रममा उनले उद्यमीहरू आफ्नो कामबाट सन्तुष्ट नभएसम्म समृद्धि पनि नआउने बताए । ‘‘उद्यमी व्यवसायीहरू जबसम्म समृद्ध हुन सक्दैनन्, जबसम्म उनीहरू सुखी हुँदैनन्, उनीहरूलाई आफ्नो कामप्रति सन्तोष हुँदैन, तबसम्म यो देश समृद्ध हुन सक्दैन,’’ उनले भने, ‘‘सबैभन्दा पहिला महिलाहरू समृद्ध हुनुप¥यो देशका उद्यमी व्यवसायीहरू समृद्ध हुनुप¥यो अनि मात्रै देश समृद्ध हुन्छ ।’ उनले आफू उद्यमीसमेत भएकाले उद्यमी व्यवसायीहरूको सबै समस्याको अन्त्य गर्न काम गरिरहेको बताए ।
त्यसका लागि मन्त्रालयमा एकद्वार प्रणालीमार्फत काम भइरहेको उनको भनाइ छ । मन्त्री दुगडले उद्यमीलाई सबै समस्या मन्त्रालयमा आएर बताउन आग्रहसमेत गरे । उनले महिला उद्यमीहरूका लागि छुट्टै व्यवास्था गरी सहयोग गर्न मन्त्रालयले योजना बनाइरहेको जानकारीसमेत दिए ।
कार्यक्रममा नेपाल राष्ट्र बैंकका डेपुटी गभर्नर चिन्तामणि शिवाकोटीले सानो–सानो कृषि गरी देश समृद्ध हुन नसक्ने बताए । उनले भने, ‘‘पाँचवटा बाख्रा पालेर मुलुकको समृद्धि हुनेवाला छैन, २ वटा भैंसी पालेर मुलुकको समृद्धि हुने छैन ।’ उनले उद्यमी व्यवसायीहरूले कृषिमा लगानी गर्ने भन्दै सरकारी अनुदानको कर्जा तथा पुनर्कर्जा लगेर खेत किन्ने केही समय धान लगाउने र ५–१० वर्षमा डबलमा बिक्री गर्ने प्रवृत्तिले पनि देश समृद्ध हुन नसकेको बताए ।
कार्यक्रममा नेपाल घरेलु तथा साना उद्योग महासंघका कार्यवाहक अध्यक्ष उमेशप्रसाद सिंहले सरकारले महिलाहरूलाई सहज कर्जा उपलब्ध गराउने नीति लिए पनि बैंकहरूले कर्जा नदिएको बताए । उनले महासंघले महिलाहरूलाई सहज होस् भन्ने उद्देश्यले राष्ट्रिय वाणिज्य बैंकसँग सम्झौता गरेको तर ४० वटा फाइल बुझाएको ४ महिना हुँदासमेत कर्जा नदिएको बताए
कार्यक्रममा महिलाहरूको उद्यमशीलता विकासमा सरकारले अझ बढी कार्यक्रमहरू ल्याउनुपर्नेमा जोड दिइएको थियो । त्यस्तै बैंकहरूबाट सहज रूपमा कर्जा उपलब्ध गराउनेदेखि बजारीकरणमा मन्त्रालयले सहयोग गर्नुपर्नेमा उद्यमीहरूले जोड दिएका थिए ।