काठमाडौं । नेपालको दामनमा निसास्सिएर मृत्यु भएका भारतीय नायर परिवार आफ्ना तीनजना छोराछोरीको जन्मदिन मनाउन युएईको दुबईबाट नेपाल आएको गल्फ न्यूजले समाचार दिएको छ । 

तीनैजना बच्चा जनवरी महिनामा जन्मेका थिए ।  ३९ वर्षीय प्रविण कृष्ण नायर, ३४ वर्षीया पत्नी सारन्या, उनीहरुका तीन छोराछोरी ९ वर्षीय श्रीभद्र, ८ वर्षीया आचा र ७ वर्षीया अभिको शव एयरलिफ्टमार्फत काठमाडौंस्थित अस्पतालमा ल्याइएको सो समाचारमा जनाइएको छ । 

गल्फ न्यूजलाई उनीहरुको परिवारका सदस्यले बताएअनुसार सो परिवार बच्चाको जन्मदिन मनाउनका लागि नेपाल आएको थियो ।

बच्चाको जन्मदिन मनाउनका लागि उनीहरुले हरेकवर्ष फरक गन्तव्य रोज्ने गरेका थिए । 

उनीहरु नयाँ ठाउँमा जान मन पराउँथे । सो परिवार १५ वर्षभन्दा अघिदेखि दुबईमा बस्दै आएको थियो । 

उनीहरु भारतको केरलाको त्रिभुवननाथपुरमका हुन् । सो परिवार तथा नायर परिवारका केही सदस्य पोखराबाट फर्किने क्रममा थिए । 

उनीहरु नेपालबाट भारत जाने तयारीमा रहेको हुँदा मकवानपुरको दामनमा बास बस्न पुगेका थिए । 

होटलमा राति बढी चिसो भएको भन्दै राति २ बजे रेष्टुरेन्टमा बलिरहेको ग्यास हिटर सो परिवारले जबर्जस्ती गरेर कोठामा लगेका थिए ।

दुईवटा कोठमा रहेका परिवार बढी चिसो भएपछि एकै कोठामा ग्यास हिटर बालेर सुतेको बताइएको छ ।

दामनको रिसोर्टका म्यानेजरका अनुसार उनीहरुले चारवटा कोठा बुक गरेका थिए । तर, उनीहरु आठै जना एउटै कोठामा बसेका थिए । बाँकी अन्य कोठामा बसेका थिए । सो क्षेत्र समुद्री सतहबाट करिब २५०० मिटरको उचाइमा छ । 

चिसो भएकोले उनीहरुले ग्यास हिटर खोेलेका थिए । दुबईमा आफ्ना नातिनातिना भेट्न गएका सारन्याका पिता शशि थरनले भने,‘‘मेरा तीनैजना नातिनातिना गए ।’’ 

नायर दुबईमा रहेको एक कम्पनीमा काम गर्थे । सारन्या आफ्नो पढाइ मास्टर्स इन फर्मास्युटिकल्स पूरा गर्न कोचीमा हालै फर्केकी थिइन् । 

जहाँ उनी आफ्ना बच्चाहरुसँग बस्थिन् । सारन्या उनका बच्चाको रेखदेखमा संलग्न थिइन् । उनलाई अर्को नाम सान्ध्याका रुपमा समेत चिनिन्थ्यो । 

नायरका साथी ३९ वर्षीय रेजीनाथ कुमार टिबी कोजीकोडेका हुन् । उनकी पत्नी इन्दु ३४, उनीहरुको छोरा भाइसनभ रेजीनाथ तथा अन्य दुई जना पनि त्यही कोठामा सुतेका थिए । 

ती तीन जनाको पनि घटनामा मृत्यु भएको छ । 

त्यो जोडीका दुई बच्चा थिए । अर्को एक छोरा माधव फरक कोठामा भएकोले बचेको जनाइएको छ ।

मकवानपुरको दामनस्थित पानोरोमा रिसोर्टमा सोमबार राति बेहोस भएर ८ भारतीयको मृत्यु भएको थियो ।

कोठामा बेहोस अवस्थामा भेटिएपछि उनीहरुलाई कैलाश एयरको हेलिकोप्टरबाट काठमाडौंस्थित हेम्स अस्पताल ल्याइएको थियो ।