काठमाडौं । सुनचाँदीको मूल्यमा उच्च वृद्धि आएपछि कारोबार नहुँदा आत्तिएका व्यवसायी मंसिरमा भने केही खुशी भएका छन् । मंसिरमा विवाहको साइत धेरै हुने र कारोबारमा पनि सुधार आएपछि सुनचाँदी व्यवसायी खुशी देखिएका हुन् । 

विवाहकै कारण मंसिरमा अन्य महिनाको तुलनामा सुनचाँदीको कारोबार बढेको व्यवसायीले बताएका छन् । नेपाल सुनचाँदी व्यवसायी महासंघले मंसिरमा कारोबार बढेको जनाएको
बाह्रखरीसँग कुरा गर्दै नेपाल सुनचाँदी व्यवसायी महासंघका महासचिव धर्मसुन्दर बज्राचार्यले तिहारपछि सुस्ताएको बजार, मंसिर सुरुभएसंगै फस्टाएको बताए । 

“तिहारको चार दिनपछि सुनको कारोबार हुन सकेको थिएन, मंसिर लागेसँगै विवाहको लगनको भएकाले कारोबार बढेको छ, बजारमा चहलपहल छ” उनले भने । 

उनका अनुसार मंसिर १७ गतेसम्ममा दुई सय ५५ किलोग्राम सुन आयात भएकोमा १ सय ७६ किलोग्राम सुन सिफारिस भएको र व्यवसायीले लैजाने क्रम रहेको बताए । यस अवधिमा बैंकबाट एक अर्ब सात करोड बराबरको सुन व्यवसायीले उठाएका छन् । 

यससँगै रत्न तथा आभूषण महासंघ र नेपाल हस्तकला महासंघले पनि सुन लैजाने गरेका छन् । जसले यस अवधिसम्म करिब तीन अर्ब बराबरको सुन कारोबार भएको उनले बताए । यद्यपी अघिल्ला वर्षको तुलनामा यस वर्षको मंसीरमा सुनको कारोबारमा पनि कमी भने आएको हो । 

बज्राचार्यले हाल दैनिक २५ किलोग्रामसम्म सुनको कारोबार भएको बताए । गतवर्ष मंसिरमा दैनिक ५० किलोग्रामसम्म सुनको कारोबार भएको थियो । 

गतवर्ष भन्दा सुनको कारोबारमा कमी आए पनि विगत तीन महिनाको तुलनामा भने कारोबार बढेको हो । देशभर रहेका करिब २२ हजार सुनचाँदी व्यवसायीहरुले दैनिक २० किलोग्राम सुन खपत गर्ने गरेको महासंघले जनाएको छ ।