दाङ । दाङमा हुने दुई स्थानको उपनिर्वाचनका लागि चार सयभन्दा बढी कर्मचारी खटिने भएका छन् । जिल्ला निर्वाचन कार्यालय दाङले चुनावमा खटिने कर्मचारीलाइ आइतबार र सोमबार तालिमको व्यवस्था गरेको छ ।
दुई स्थानका ३४ मतदानस्थल र ८२ केन्द्रमा खटिने मतदान अधिकृत र सहायक मतदान अधिकृतका लागि तालिम दिने भएको हो । निर्वाचनमा चार सय १० कर्मचारी र तीन सय २६ स्वयमसेवक खटिने भएका छन् ।
मंसिर ११ गतेदेखि मतदानस्थलमा खटिने गरी अधिकृत र सहायक मतदान अधिकृतलाई कसरी निर्वाचन गराउने भन्ने विषयमा तालिम दिन लागिएको मुख्य निर्वाचन अधिकृत रितेन्द्र थापाले जानकारी दिएका छन् ।
निर्वाचनको अवधिमा ८२ मतदान अधिकृत, ८२ सहायक मतदान अधिकृत, १६४ जना सहायक कर्मचारी र ८२ सहयोगी खटिने छन् । यस्तै तीन सय २६ जना कर्मचारी स्वयमसेवकका रुपमा खटाइने भएको छ भने मतदाता शिक्षा कार्यक्रम पनि जारी छ ।
दुई हजार सुरक्षाकर्मी परिचालन
दाङमा हुने दुई स्थानको उपनिर्वाचनलाई लक्षित गरी दुई हजार सुरक्षाकर्मी परिचालन हुने भएका छन् । निर्वाचन क्षेत्र नम्बर ३ को ९२० र घोराही १६ का लागि २ हजार सुरक्षाकर्मी परिचालन हुने भएका हुन् ।
२२ स्थानमा अस्थायी क्याम्प नै राखेर सुरक्षाकर्मी परिचालन गरिने जिल्ला सुरक्षा समिति दाङले जनाएको छ । नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान गरी दुई हजार सुरक्षाकर्मी परिचालन गर्न लागिएको प्रमुख जिल्ला अधिकारी गोबिन्दप्रसाद रिजालले जानकारी दिएका छन् ।
दुई हजार सुरक्षाकर्मीसँगै २६ वटा सवारीका साधान समेत प्रयोग गरेर सुरक्षाकर्मी परिचालन हुने उनको भनाई छ । यही मंसिर १४ गते हुने उपनिर्वाचनलाई भय रहित र मर्यादित बनाउन आवश्यक सुरक्षा रणनीति प्रभावकारी बनाइएकोसमेत प्रमुख जिल्ला अधिकारी रिजालले बताएका छन ।
निर्वाचन हुने क्षेत्रहरुमा अहिले पनि गस्तीमा सुरक्षाकर्मी खटाइएको छ । सुरक्षित निर्वाचनका लागि सुरक्षा संवेदनशिलताका आधारमा सुरक्षाको जनशक्तिको व्यवस्था गरिएको सुरक्षा समितिले जनाएको छ ।
