काठमाडौं । नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले अर्का वरिष्ठ नेता झलनाथ खनाललाई वरीयतामा आफूभन्दा माथि राख्ने भए आफ्नो पक्षका तीनजना नेतालाई उपाध्यक्ष बनाउनुपर्ने प्रस्ताव गरेका छन् । पार्टीको जारी सचिवालय बैठकमा उनले यस्तो प्रस्ताव गरेको स्रोतले जनाएको छ । 

स्रोतका अनुसार नेपालले अष्टलक्ष्मी शाक्य, भीम रावल र युवराज ज्ञवालीलाई उपाध्यक्ष बनाउनुपर्ने प्रस्ताव गरेका हुन् । साथै नेपालले तीनैजना स्कुल विभाग प्रमुख ईश्वर पोखरेलभन्दा वरीयतामा माथि हुनुपर्ने अडान पनि राखेका छन् ।

यसअघिको बैठकमा खनालले आफू माधव नेपालभन्दा वरीयतामा माथि हुनुपर्ने अडान राखेपछि नेपालको यस्तो प्रस्ताव आएको हो । 

यसअघिको सचिवालय बैठकले बामदेव गौतमलाई उपाध्यक्षमा सिफारिस गरिसकेको छ ।