काठमाडौं । निजी क्षेत्रको दूरसञ्चार सेवा प्रदायक कम्पनी एनसेल प्रालिको लाभकरसम्बन्धी मुद्दाको फैसला सरेको छ । सर्वोच्च अदालतको पूर्ण इजलासबाट मंगलबार सो मुद्दामा फैसला सुनाउने मिति तोकिएको थियो । तर, आज फैसला नसुनाइएको सर्वोच्च अदालतका सहप्रवक्ता देवेन्द्र ढकालले जानकारी दिए । उनका अनुसार अब एनसेल मुद्दाको फैसला साउन ३० गते हुनेछ । 

एनसेलको ८० प्रतिशत सेयर खरिद–बिक्री हुँदा भएको लाभकर छलीको मुद्दा प्रधानन्यायाधीश चोलेन्द्र शमशेर राणासहितको पूर्ण इजलासले यसअघि नै फैसला गरिसकेको थियो । तर, रिटको क्षेत्राधिकार अन्तर्गत एनसेल पुनः सर्वोच्च अदालत पुगेको हो । एनसेलले आफूले लाभकर छुट पाउनुपर्ने जिकिर गरेको छ । 

मंगलबार न्यायाधीशहरु तेजबहादुर केसी, पुरुषोत्तम भण्डारी, डम्बरबहादुर शाही, सुष्मालता माथेमा र डा. मनोजकुमार शर्माको बृहत् पूर्ण इजलाशले सुनुवाई गर्दै फैसला गर्ने मिति तोकिए पनि हुन सकेन । 

प्रधानन्यायाधीश राणा र न्यायाधीशहरू मीरा खड्का, विश्वम्भरप्रसाद श्रेष्ठ, आनन्दमोहन भट्टराई र टंकबहादुर मोक्तानको बृहत् पूर्ण इजलासले २०७५ माघ २३ गते एनसेलले लाभकर तिर्नुपर्ने फैसला सुनाएको थियो । बृहत् इजलाशले कर नतिरेसम्म कसैलाई पनि लाभांश वितरण र सेयर बिक्री अनुमति नदिनू भन्ने परमादेश नै जारी गरेको थियो ।