काठमाडौं । मलेसियाको रोजगारी खुलाउन नेपाल वैदेशिक रोजगार व्यवसायी संघले वैदेशिक रोजगार विभागको ध्यानार्षण गराएको छ । सरकारले २०७५ जेठ २ देखि मलेसिया जान चाहने नयाँ कामदारलाई श्रम स्वीकृति दिन बन्द गरेको थियो ।

वैदेशिक रोजगारीको सिलसिलामा मलेसिया जाने कामदारलाई आर्थिक भार परेकोभन्दै आर्थिक भार परेका संस्थाहरुको खारेजीको घोषणा पश्चात बन्द गरेको मलेसियाको रोजगारी गत कात्तिक १२ गते श्रम सम्झौता गरेपछि सुचार गर्नुपर्ने थियो । तर विभिन्न बाहानामा श्रम सम्झौता भएको नौँ महिना भइसक्दा पनि मलेसियाको रोजगारी सुचारु हुन नसकेको भन्दै आन्दोलन गर्न बाध्य भएको व्यवसायीहरुले बताएका छन् । 

लामो समयसम्म नयाँ कामदारलाई श्रम स्वीकृती नदिएपछि व्यवसायीहरुले मंगलबार वैदेशिक रोजगार विभागका महानिर्देशक भिष्मकुमार भूसाललाई माग सम्बोधन गर्न ध्यानाकर्षण गराएका हुन् । माग सम्बोधन नभए धर्नाबाट सुरु भएको कार्यक्रम आन्दोलनमा पुग्ने चेतावनी व्यवसायीहरुले दिएका छन् ।

यसैबीच रोजगार व्यवसायी संघका अध्यक्ष रोहन गुरुङ्ले मलेसियाको रोजगारी नखुलाए सरकारलाई लाइसेन्स् बुझाउन तयार भएको बताएका छन् । “सरकारले मलेसियाको रोजगारी नखुलाए लाइसेन्स् बुझाउन तयार छौँ, व्यवसायीको कुरा नसुने विभागको जिम्मा सरकारले लेओस्, ” उनले भने ।

त्यसैगरी, संघका महासचिव सरोज पोख्रेलले नेपाल सरकार, मन्त्रीदेखी वैदेशिक रोजगार विभागको महानिर्देशकसम्मलाई मलेसिया रोजगारीलगायत व्यवसाय क्षेत्रका सम्पूर्ण समस्याका विषयमा पटक-पटक आग्रह गर्दापनि माग सुनुवाहि नभएकाले दवावमुलक ढंकले उपस्थित हुन बाध्य भएको बताए ।

"पेसा व्यवसायीलाई व्यवसाय गर्न लाइसेन्स दिने तर श्रम सम्झौता गरेकै मुलुकमा कामदार पठाउन बन्द गरेको छ कि इराकको जस्तै अवस्था भएर बन्द गरेको भए भनोस् वा श्रम सम्झौता नै गलत छ सम्झौता रद्द गर्छौ भन्नुपर्यो नी, नत्र कुनै कारणबिना लाखौँ युवाहरुको बास, गास र कपास खोस्ने काम सरकारले गरेको छ । शान्तिपुर्ण ढंगबाट सुरु भएको विरोध आन्दोलनमा पुग्न नपरोस्," व्यवसायीले भने ।

सरकारले मलेसिया जाने नयाँ कामदारको श्रम सम्झौता रोकेको, कलिङ् भिसा आउँदा पनि जान नपाएको बताएका छन् । यसैबीच वैदेशिक रोजगार विभागका महानिर्देशक भिष्मकुमार भूसालले कलिङ् भिसा आएका कामदार दैनिक मलेसिया गएको बताउँदै यस सम्बन्धी सम्पूर्ण समस्या हप्ता दिनसम्म टुंगो लाग्ने बताए । 

महानिर्देशक भूसालका अनुसार गत आर्थिक वर्षमामात्र ४२ हजार १ सय ४६ जना नेपालीहरु मलेसिया गएका छन् भने नयाँ आर्थिक वर्षको साउन १३ गतेसम्ममा १३ हजार ८ सय ३ जनाले लागि श्रम स्वीकृत भएको बताएका छन् । वैदेशिक रोजगारीको सिलसिलामा दैनिक एक हजारभन्दा बढी नेपाली युवाहरु मलेसिया जाने गरेका थिए ।