काठमाडौं । नेपाल राष्ट्र बैंकका गभर्नर महाप्रसाद अधिकारीले बैंकहरूले ऋण दिँदाखेरी ध्यान नदिँदा प्रोभिजन बढ्दै गएको बताएका छन् । बुधबार नेपाल बैंकर्स संघको ३८औँ वार्षिक साधारणसभाको अवसरमा अधिकारीले असल अभ्यास गर्ने बैंकहरूले राम्रो प्रतिफल दिँदै आएको बताएका हुन् ।

अबका दिनमा बैंकहरूलाई केही सहज हुँदै जाने अधिकारी बताउँछन् । अफ्ठ्यारो अवस्थालाई सहनुपर्ने उनले बताए ।

कोभिड र भूकम्पका कारण राष्ट्र बैंकले लिने नीतिमा खुकुलोपन आएको र त्यसको फाइदा उठाउन खोज्दा बैंकहरूलाई नै समस्या परेको उनको भनाइ छ ।

"बैंकलाई बचाउन हामीले काम गरिरहेका छौँ । खराब कर्जा बढ्दै जाँदा समस्या उत्पन्न भएको हो । हामीले बैंकहरूले डिभिडेन्ट घटाउन प्रोभिजन बढाएका हैनौँ," उनले भने, "बैंकको आफ्नो कारणले प्रोभिजन बढेको हो । लोन दिँदा ख्याल गर्ने बैंकहरू समस्यामा छैनन्, डिभिडेन्ट राम्रै दिएका छन् ।"

अबका दिनमा बैंकले दुःख मान्नु पर्ने अवस्था नरहेको अधिकारीको भनाइ छ । बैंकहरूले रिकोभरीलाई ख्याल गर्नुपर्ने अधिकारी बताउँछन् ।

"बैंकहरूलाई चुनौती देखिने भनेको रेगुलेटर कम्प्लायन्समा हो," गभर्नर अधिकारीले भने, "राष्ट्र बैंकले पोलेसी रेट एउटै राख्न हुँदैन । समयअनुसार करेक्सन गर्नुपर्छ । बैंकको ऋण तिर्नै पर्दैन भन्ने बजारको हल्लाले पनि समस्या निम्तिएको हो ।"