काठमाडौं । प्रमुख प्रतिपक्षी दल नेपाली कांग्रेस र अर्को प्रतिपक्षी राष्ट्रिय जनता पार्टी (राजपा)ले आज संसद बैठक अवरोध नगर्ने भएका छन् । उनीहरुले बाढीपहिरो र डुबानसम्बन्धी जरुरी सार्वजनिक महत्वको प्रस्ताव लैजाने तयारी गरेका छन् ।
सो प्रस्तावमाथि छलफल गराउन सभामुख कृष्णबहादुर महरा तयार भए संसद् बैठक अवरोध नगर्ने कांग्रेसका प्रमुख सचेतक बालकृष्ण खाँणले जानकारी दिए । “अहिले बाढीपहिरो, डुबानलगायत प्राकृतिक विपद्को अवस्था छ । यसबारे सदनमा छलफल होस् र विपद् व्यवस्थापन प्रभावकारी बनोस् । सरकारको ध्यान जाओस् भनेर जरुरी सार्वजनिक महत्वको प्रस्ताव लैजाँदैछौं,” प्रमुख सचेतक खाँणले भने, “सभामुखले सो प्रस्ताव स्वीकार गर्नुभयो भने छलफल हुन्छ । त्यसमाथि छलफल गर्ने गरी संसद्मा छलफल हुने भएमा हामी अवरोध गर्दैनौं ।”
कांग्रेसले यसअघि गैरन्यायिक हत्या र प्रहरी दमन बढेको भन्दै सोबारे छानबिन गर्न संसदीय समिति गठनको माग गर्दै संसद् अवरोध गरेको थियो । पूर्ववत् आफ्नो अडान भने कायमै रहेको कांग्रेस सचेतक खाँणले बताए । सभामुख महराले संसद्को अवरोध हटाउन मंगलबार संसदमा रहेका सत्तारुढ र प्रतिपक्षी दलका नेताहरुसँग छलफल गरेका थिए ।
यसैबीच संसद्को कार्यसूची भने डेढ घण्टाका लागि धकेलिएको छ । दिउँसो १ बजेबाट सुरु हुने भनिएको संसद् बैठक २ः३० बजे बस्ने भएको छ । १ बजे कार्यव्यवस्था परामर्श समितिको बैठक बस्ने संसद सचिवालयले जनाएको छ ।