काठमाडौं । भिभान्ता काठमाडौंले फेरि नेपाली खाना पारखीलाई भिन्नै खानाको स्वाद चखाउने भएको छ । गत महिना ‘डिम सम्म’ फुड फेस्टिभल आयोजना गरेको भिभान्ताले विश्वभरको कबाबको स्वाद आगामी शुक्रबारदेखि १० दिनसम्म आफ्नै परिसरमा रहेको ‘मिन्ट’ मा उपलब्ध गराउन लागेको हो ।

प्रत्येक महिना फरक फुड फेस्टिभल गर्ने भिभान्ताको योजनाअनुसार होटलले नेपाली खाना नभएपनि नेपाली स्वादसँग मिल्ने कबाब उपभोक्तासामू प्रस्तुत गरेको हो । मध्यपूर्वी भाषामा कबाबको अर्थ ‘रोस्ट गर्नु’ अर्थात् ‘पोल्नु’ भन्ने हुन्छ । यो खाना मध्यपूर्वका सैनिकले सयौं वर्षौं पहिले बनाएको बताइन्छ । उनीहरुले तरवारले भेडा, बाख्रा शिकार गरेर त्यसैमा उनेर आगोमा पोलेर खाने चलन सुरु गरेका थिए । अहिले भने विश्वभर स्थानीय स्वादअुनसार कबाब तयार पारिन्छ ।

पहिले भेडा र बाख्राको मात्र कबाब बनाइए पनि अहिले माछा, समुन्द्री खाना, पोर्क, बिफ, पनिर, आलु, फलफूलको पनि कबाब बनाइने गरिन्छ । भिभान्ताले पनि विश्वभरको कबाब स्वादलाई नेपाली खाना पारखीलाई चखाउनका लागि फुड फेस्टिभल आयोजना गरेको हो ।

फुड फेस्टिभल हरेक साँझ ६ बजेदेखि राति १०:३० सम्म चल्दछ । जसमा उपभोक्ताले तोकेको शूल्क तिरेर असिमित कबाब खान सक्दछन् । यस प्रबर्द्धनात्मक फेस्टिभलमा कबाबको मजा लिन प्रतिव्यक्ति १५ सय रुपैयाँ (करबाहेक) तिर्नुपर्ने छ । अल्कोहलसहित कबाबको स्वाद लिन भने प्रतिव्यक्ति २ हजार रुपैयाँ (करबाहेक) तिर्नुपर्ने हुन्छ । फुड फेस्टिभलको नाम ‘कबाब्स, कबाब एन्ड सरप्राइजेज’ राखिएको छ ।

कबाबलाई सामान्यतया मेने कोर्सको साइड डिस वा स्टार्टर (स्न्याक्स)का रुपमा खाने गरिन्छ । तर, भिभान्ताले यसलाई मेन कोर्सको रुपमा खाने व्यवस्था मिलाएको छ । फेस्टिभलमा कबाब मात्र नभएर उपभोक्ताले फुल बुफे नै पाउने भिभान्तका एक्जुकेटिभ एसिस्ट्यान्ट टु जेनेरल म्यानेजर अन्जुम गुरुङले बताइन् । 

बाह्रखरीसँग उनले भनिन्, “फेस्टिभलमा खानाको स्वाद सलादबाट सुरु गरेर, दैनिक फरक दाल, नान रोटी, तन्दुरी रोटी आदि र अन्त्यमा डेजर्ट (गुलाब जामुन वा गाजरको हलुवा) पनि उपलब्ध हुनेछ ।” फेस्टिफल कबाब मात्र नभएर पूर्ण बुफे डिनर लिन पाउने अवसर पनि रहेको दाबी उनको छ ।

उनले भनिन्, “सेकुवा पनि कबाब नै हो । विश्वभर चलेको कबाबको स्वाद नेपाली उपभोक्तामाझ परिचित गराउन फेस्टिभल आयोजना गरेका हौं ।”

केके उपलब्ध छ ?

१) अफघानी शिख - मटन किमालाई मोल्ड (तीरमा वरिपरि टाँसेर ससेजजस्तो बनाइने) गरेर बनाइने कबाब
२) गलौटी कबाब - किमालाई चपजस्तो बनाएर बनाइने कबाब
३) बोटी कबाब - उर्दुमा मासुको ठूलो टुक्रालाई बोटी भनिन्छ । यो कबाब तन्दुरमा तयार पारिन्छ ।
४) मलाइ टिक्का - दहीको मेरिनेडमा जुसि चिकेन टुक्रालाई झिरमा उनेर तन्दुरमा राखेर तयार पारिने कबाब
५) तङ्गडी कबाब - चिकेन ड्रमस्टिकबाट बन्ने कबाब
६) अमृतसरी फिस - तातो ग्रिडलमा राखेर तयार पारिने अमृतसरी फिसको कबाब
७) सर्सों वाली मछली - माछामा सर्सिउँ (तोरी) र दही राखेर बनाइने कबाब
८) पनीर टिक्का (रातो) - घन आकारको पनिरलाई तन्दुरमा पोलेर बनाइने कबाब
९) अर्बीको शमी कबाब - पिँडालुको कबाब
१०) दही के कबाब