मारिनुअघि ‘भाइ–भाइ’ भन्दै सँगै चिया पिएका थिए प्रहरी र विप्लव कार्यकर्ताले !

मारिनुअघि ‘भाइ–भाइ’ भन्दै सँगै चिया पिएका थिए प्रहरी र विप्लव कार्यकर्ताले !

घटनामा मारिएका विप्लव समूहका नेता निरकुमार र प्रहरी जवान सञ्जिव । 


काठमाडौं । भोजपुर सदरमुकाममा बुधबार (हिजो) प्रहरी–विप्लव समूहको गोली हानाहानमा दुवैतर्फ एक–एक जनाको ज्यान गयो । ज्यान गुमाउनेमा जिल्ला प्रहरी कार्यालयमा कार्यरत प्रहरी जवान सञ्जिव राई र विप्लव समूहका नेता निरकुमार राई छन् ।

विप्लव समूहका ओखलढुङ्गा इञ्जार्ज रहेका निरकुमार श्रीमती र छोराछोरी भेट्न घर भोजपुर पुगेका थिए । बुधबार बिहान साढे आठ बजेको समयमा दोहोरो भिडन्त भएको प्रहरी प्रधान कार्यालयले पुष्टि गरेको थियो । घटनामा अन्य दुईजना प्रहरी जवान समेत घाइते भएका थिए । तर, घटनामा ज्यान गुमाएका प्रहरी जवान र विप्लव समूहका नेताबीच चिनजान भएको र बुधबार बिहान उनीहरुले सँगै चिया खाएको खुलेको छ ।

कारोबार दैनिकका भोजपुर संवाददाता अर्जुन बस्नेतका अनुसार प्रहरी जवान सञ्जिव र विप्लव समूहका नेता निरकुमारबीच बुधबार बिहान आठ बजे पान्धारे होटलमा भेट भएको थियो । प्रत्यक्षदर्शीको भनाइलाई उद्धृत गर्दै बस्नेतले बाह्रखरीसँग भने, ‘‘बुधबार बिहान उनीहरुबीच भेट भयो । त्यो भेट आकस्मिक थिएन । दुवैले दाजुभाइको साइनो पनि लगाए । दुवै एकै टेबुलमा बसेर चिया पिउन थाले । गफकै क्रममा सञ्जिवले ‘विप्लवको पार्टीमा लाग्यो भन्दैमा मेरो पछि किन लाग्छौ ?’ भन्दै प्रश्न गरेका थिए । त्यसक्रममा प्रहरी जवान राईले ‘होइन, हामी त दाजुभाइ हो’ भनेका रहेछन् ।’’ त्यसपछि आफूलाई प्रहरीले समात्ने चाल निरकुमारले पाएपछि उनी पिसाब फेर्ने बहानामा भाग्न खोजेका थिए ।

भिडन्त भएको भनिएको स्थान ।निरकुमार भाग्न लाग्दा सञ्जिवले पाखुरामा समात्दै ‘बसौं, साथीहरु आउँदैछन्’ भन्दै रोक्न खोजेपछि दुई जनाबीच विवाद सुरु भएको थियो । दुईबीच धकेलाधकेल हुँदा उनीहरु सडकमा पुगेका थिए । प्रत्यक्षदर्शीलाई उद्धृत गर्दै बस्नेतले भने, “विवाद हुँदै गर्दा गोली चलेको आवाज सुनियो । कसले कुनबेला चलायो थाहा छैन । दुवै त्यहीँ ढले । गोली चलेपछि हामी त्रसित भयौं । धेरै सोधीखोजी गर्ने कुरा पनि भएन ।”  

प्रहरीले विप्लव समूहका नेताले गोली चलाएपछि जवाफी फायरिङ गरिएको बताएको छ भने विप्लव समूहका नेताहरुले भने आफ्नो तर्फबाट गोली नचलेको दाबी गर्दै आएका छन् । यद्यपि, भोजपुर घटनाबारे विप्लव समूहले बिहीबार दिउँसोसम्म आधिकारिक धारणा सार्वजनिक गरेको छैन । 

प्रदेश नम्बर एकका डीआईजी ठाकुरप्रसाद ज्ञवालीले सादा पोशाकमा रहेका प्रहरीमाथि हतियारधारी समूहले गोली चलाएको बताएका छन् । विप्लव समूहको गोली प्रहारबाट प्रहरी जवान खेमनाथ भट्टराई र सुरेन्द्र माझी घाइते भएको उनले जानकारी दिए । भिडन्त भएको स्थान जिल्ला प्रहरी कार्यालयबाट सात सय मिटरको दूरीमा मात्र छ । विप्लव समूहमाथि सरकारले प्रतिबन्ध लगाएपछि प्रहरीले नेकपा नेता–कार्यकर्ताविरुद्ध ‘सर्च एण्ड अरेस्ट’ अपरेसन चलाएको छ । सञ्जिव विप्लव समूहको गोली लागेर मारिने पहिलो प्रहरी जवान हुन् भने यसअघि प्रहरी कारबाहीमा विप्लव समूहका तीर्थ घिमिरे र सर्लाही इञ्जार्ज कुमार पौडेलको ज्यान गएको थियो ।

प्रतिकृया दिनुहोस
ad