काठमाडौं । सत्तारूढ नेपाल कम्युनिस्ट पार्टी (नेकपा)का केन्द्रीय सदस्य लेखनाथ न्यौपानेले पार्टीभित्र अनेकौँ दीपक मनाङे रहेको भन्दै कोकोहोला गर्नु नपर्ने बताएका छन् । आपराधिक पृष्ठभूमि, विगतमा गुण्डागर्दीमा संलग्न प्रदेशसभा सदस्य रहेका मनाङका राजीव गुरूङ उर्फ दीपक मनाङेलाई पार्टीमा भित्र्याएका प्रति उनको कटाक्ष हो ।
उनले सामाजिक सञ्जालमा लेखेका छन्– “अनगिन्ती मनाङ्गे पार्टीमा पहिल्यै छन्, थिए । एउटा थपिएको मात्र हो । जाबो एउटा मनाङे थपिँदा केको कोकोहोलो हो कुन्नी ?”
मनाङे नेकपा प्रवेश गर्न लागेको थाहा पाएपछि रसिया भ्रमणमा रहेका स्थायी कमिटी सदस्य योगेश भट्टराईले पनि आपत्ति जनाएका थिए ।
गुण्डागर्दीमा संलग्न मनाङेले जेलनेल भोगेका छन् । पछिल्लो समय उनलाई अदालतले सफाइ दिएपछि सांसद पद थामिएको थियो । मनाङे मनाङबाट प्रदेशसभामा निर्वाचित सदस्य हुन् ।
निर्वाचनका बेला तत्कालीन वाम गठबन्धनले उनलाई अप्रत्यक्ष रूपमा सघाएको थियो ।