काठमाडौं । पार्टीभित्र राजनीतिक कार्यदिशामा विवाद चर्किएपछि नेकपा केपी शर्मा ओली र पुष्पकमल दाहाल ‘प्रचण्ड’ संवादमा जुटेका छन् । अध्यक्षद्वयबीच आज बिहान बालुवाटारमा भेटवार्ता भएको हो । छलफल सकारात्मक रहेको बालुवाटार स्रोतले जानकारी दियो ।

भेटवार्तामा राजनीतिक कार्यदिशा र प्रतिवेदन छाप्ने विषयमा देखिएको गत्यावरोध हटाउने प्रयास भएको स्थायी कमिटी सदस्य देवेन्द्र पौडेलले जानकारी दिए । पौडेलले विगतमा भएको समझदारीअनुरूप राजनीतिक प्रतिवेदन छापेर बाँड्ने विषयमा छलफल केन्द्रित रहेको र निकास निस्किइनसकेको जानकारी दिए ।

“दुई अध्यक्षबीच संवाद जारी छ, बिहानको बैठकमा पनि राजनीतिक कार्यदिशाकै बारेमा छलफल भयो,” उनको भनाइ थियो । पार्टी एकीकरण गर्दा एकीकृत पार्टीको राजनीतिक–वैचारिक कार्यदिशा जनताको जनवाद राख्ने सहमति भएको थियो । दस्तावेजसमेत तयार पारेर सम्पादनका लागि अध्यक्षद्वयलाई बुझाइए पनि वर्षदिनसम्म छापिएको थिएन ।

गत शुक्रबारको सचिवालय बैठकमा प्रतिवेदन छापौं भन्दा अध्यक्ष केपी ओलीले पुनर्लेखन गरेर जनताको बहुदलीय जनवाद राख्नुपर्ने तर्क गरेपछि नेकपाभित्रको अन्तरकलह सतहमा आएको थियो ।

“बैठकमा सबै पक्षले आ–आफ्ना कुरा राख्न पाउँछन् । त्यसैका लागि बैठक आयोजना हुन्छ । तर, पूर्वसहमतिबाट पछाडि फर्कने अनुमति कसैलाई छैन । पूर्वसहमतिबाट पछाडि हट्दा सबैकुरा बिग्रन्छ र पुरानै ठाउँमा पुगिन्छ । एकताको अर्थ रहँदैन,” पूर्वमाओवादी निकट नेता बताउँछन् ।

उनले नेकपामा अहिले त्रिशङ्कु समीकरण भएको बताउँदै एकले अर्कालाई निषेध गरेर जान नसक्ने बताए । “नेकपाका अहिले तीन ध्रुव छ । एकले अर्कालाई पेलेर जान सक्दैनन् । अन्ततः मिल्नैपर्छ । राजनीतिक कार्यदिशाको विषय पनि त्यस्तै हो,” उनी थप्छन् ।

ओली प्रचण्ड दुवैलाई ‘ब्याकफायर’

आलोपालो सरकार चलाउने सहमति र कार्यदिशा विवादले सत्ताधारी दल नेकपा तरङ्गित बनेको छ । नेता–कार्यकर्ताबीच ध्रुवीकरण बढेको छ ।  पार्टी एकताको अघिल्लो दिन दुई अध्यक्षबीच समान अवधि सरकार चलाउने सहमतिबारे खुलासा गर्दा प्रचण्ड अप्ठ्यारोमा परेका थिए । प्रचण्डको अभिव्यक्तिले पूर्वएमाले पंक्तिलाई झस्काएको थियो । र, ध्रुवीकरण बढाएको नेकपाका नेता बताउँछन् ।

अहिले पूर्वसहमति भइसकेको राजनीतिक प्रतिवेदनमा जबज थप्नुपर्ने तर्क तेर्स्याएपछि त्यसले ओलीलाई अप्ठ्यारोमा पारेको पूर्वमाओवादी केन्द्रका नेतालाई एकठाउँमा उभिने आधार तयार गरिएको नेकपाका नेता बताउँछन् । “हिजो जे सहमति भएको छ, त्यसको इमान्दार कार्यान्वयन नै आजको आवश्यकता हो । हिजोको ठाउँबाट अघि बढ्ने चेष्टा गरेकैले पार्टी एकता भएको हो, पछाडि फर्कने ठाउँ छैन,” पूर्वमाओवादी केन्द्रका नेता बताउँछन् ।

फाइल तस्बिर