बीबीसी । आईसीसी विश्वकप क्रिकेटमा निकै कमजोर प्रदर्शन गरेको पाकिस्तानी टोलीमा ठूलो फेरबदल हुने अवस्था आएको छ । विश्वकपमा सहभागी १० टिममा पाकिस्तानी टोली अंक तालिकाको नवौं नम्बरमा छ । पाकिस्तानी टोलीले खेलेका पाँच खेलमध्ये एक खेलमा मात्रै जित निकालेको छ । पाकिस्तानी टोलीका खेलाडी मोहम्मद हफीज खराब प्रदर्शनका कारण सबै खेलाडी दुःखी भएपनि बाँकी खेलका जित निकाल्दै सेमिफाइलमा स्थान बनाउन लागिपरेको बताउँछन् ।
सन् १९९२ को विश्वविजेता पाकिस्तान जारी विश्वकपबाट बाहिरिने सम्भावना बढी छ । पाकिस्तानी टोली विश्वकप सेमिफाइनलसम्म पुग्न बाँकी चार खेलको नतिजा आफ्नो पक्षमा मात्रै पार्दै अन्य टोलीको नतिजा समेत कुर्नुपर्नेछ । पाकिस्तानले आफ्नो अर्को खेल आइतबार दक्षिण अफ्रिकासँग खेल्दैछ । हफीज भन्छन्, ‘‘पाकिस्तानलाई अंक तालिकाको नवौं नम्बरमा हेर्नु हाम्रा लागि निकै दुखद् कुरा हो ।’’
पाकिस्तानले जारी विश्वकपमा इङ्ल्यान्डले दिएको ३४८ रनको ठूलो लक्ष्यविरुद्ध जित निकालेको थियो । जहाँ हफीजले ८४ रनको आक्रामक इनिङ खेलेका थिए । पाकिस्तानको सुरुवात निकै कमजोर भएको थियो । पहिलो खेलमा वेस्ट इन्डिजसँग ७ विकेटले पराजित पाकिस्तान भारत र अस्ट्रेलियासँग पनि हारेको थियो । वर्षाका कारण श्रीलंकासँग भने अंक बाँड्न बाध्य भएको थियो । दक्षिण अफ्रिकासँगै पाकिस्तानले न्युजिल्याण्ड, अफगानिस्तान र बङ्लादेशसँग खेल्न बाँकी छ ।
‘‘म्याच जित्नका लागि पूरै टिमले राम्रो प्रदर्शन गर्न जरुरी छ । व्यक्तिगत प्रदर्शनले मात्रै सबै सम्भव हुँदैन ।’’ ३८ वर्षीय हफीजले भारतसँगको हारपछि भएको आलोचनाबारे भने, “हामी कुनै एक व्यक्तिलाई दोष दिन चाहन्नौं । हारको जिम्मेवारी सबैको हो । मिडियाले चलाएको नकारात्मक अभियानप्रति दुःखी छौं ।’’
उनले थपे, ‘‘यहाँसम्म कि खेलाडीका परिवारसम्मलाई निसाना बनाउन थालिएको छ । जब हामी जित्छौं, त्यतिबेला किन जितको चर्चा हुँदैन । मलाई थाहा छ, यो पाकिस्तानका लागि असहज अवस्था छ तर सबै सम्भावना समाप्त भइसकेको छैन ।’’ हफीजले भारतविरुद्ध टस जितेर पहिले फिल्डिङ गर्ने निर्णयको बचाउसमेत गरे । तर पाकिस्तानका प्रधानमन्त्री तथा पूर्व क्रिकेटर इमरान खानले पहिले ब्याटिङ गर्ने सुझाव दिएका थिए । १९९२ को वर्ल्डकप जित्दा इमरान पाकिस्तानी टोलीका कप्तान थिए । हफीजले भने, ‘‘यो पूरै टिमको फैसला थियो । कसैले गरेको ट्विटको आधारमा फैसला लिन सकिँदैन । हामीले राम्रो बलिङ गर्न सकेनौं त्यसैले हार्यौं ।’’
पाकिस्तानी टोलीका पूर्व तीव्र गतिका बलर अकीब जावेदले कप्तान सरफराज अहमद गल्तीका लागि पाकिस्तानी टिमको कप्तान बनेको टिप्पणी समेत गरेका छन् । उनले सरफराज कप्तानका लागि योग्य नभएको बताए ।
उनले भने, ‘‘सन् २०१५ बाटै सरफराज टोलीका आफ्नो स्थानका लागि संघर्ष गरिरहेका थिए । उनी गल्तीले कप्तान बने । किनभने बोर्ड हरेक विश्वकपपछि टोलीमा परिवर्तन गर्छ ।’’