काठमाडौं । सार्वजनिक ऋण व्यवस्थापन कार्यालयले धितोपत्र दोस्रो बजारमा सरकारी बचतपत्रको कारोबार गर्ने तयारी थालेको छ । कार्यालयले आफ्नै डोम्स (डीओएमएस) प्रणालीमार्फत् नेपाल स्टक एक्सचेन्ज (नेप्से)सँग सहकार्य गरी बचतपत्र कारोबार गर्ने तयारी गरेको हो ।

कार्यालयका सूचना अधिकारी डिलाराम गिरीका अनुसार नेप्सेको कारोबार प्रणालीमा नै ‘गभर्मेन्स बण्ड’ भनेर अप्सनको व्यवस्था गरिनेछ । अहिले कार्यालयले नौ प्रतिशत ब्याज दिने वैदेशिक बचतपत्र र आठ प्रतिशत ब्याज दिने नागरिक बचतपत्र खुला गरेको छ । अनलाइन सिस्टममार्फत यी बचतपत्रमा आवेदन दिन सकिनेछ ।

अहिले प्राथमिक बजारमा खुला गरेका यस्ता बचतपत्रहरूको दोस्रो बजारमा कारोबार गराउन सीडीएस एण्ड क्लियरिङ (सीडीएससी), नेप्से र राष्ट्र बैंकसँग छलफल अगाडि बढाइएको छ ।  

केही दिनअघि पनि यी चार निकायको छलफल भएको थियो । दोस्रो बजारमा यस्ता बचतपत्र कसरी कारोबारमा ल्याउने भन्ने विषयमा कुरा भएको कार्यालयका प्रमुख दीर्घराज मैनालीले बताए । उनका अनुसार केही समयभित्र नै बचतपत्रहरू दोस्रो बजारमा हाल कारोबार हुँदै आएका बैंकका ऋणपत्र जस्तै कारोबार हुनेछ ।

सरकारले यसरी निश्चित अवधिका लागि खुला गरेका बचतपत्रमा लगानी गर्दा लगानीकर्ताको लगानीको सुरक्षा हुने मैनालीको भनाइ छ ।